Ka MPSS Security Agency kawa man ka thaw e sikai wow man kam ki Security Guard kawa em ha Thadmuthlong-C Phramer, West Jaiñtia Hills District, ha ka 6 tarik da pyndep ko ya ka Passing Out Parade neibynta ki 30 ngut kiwa da chah hikai kiwa kynthup ya 17 ngut chynrang wa 13 ngut ki kynthai na Ri-loom Khasi wa Jaiñtia.
Kani ka e sikai toh neibynta 45 sngi wei ya ka yalang da pynlai da u P. Muksor uwa man leh kam u Managing Director yong ka MPSS heiwa da wan sakhi da u Spearsing Paslein, DSP ka East Jaiñtia Hills kam u kongsan, u Siril Suja kam u symbood kongsan hei emlang u Rev. CL Susngi, u Yooki Suchiang, Secretary Chnong ka Phramer wa kiwi kiwi.
Ha kani ka sngi da em leh chiboon ki kaam pynwyrngia nadooh i chaad i rwai ka Parade wa kiwi kiwi.
U S. Paslein kam u kongsan da yaroh u ya u P. Muksor wa da ye u wanrah kam kani ka Training Centre hapoh Ri-loom Jaiñtia, da ong u leh wa ki khynnah leh toh u man ki kiwa yaichah khamtam hawa kam kani ka pyrthai wa dooh khih dooh kreh.
U S. Suja kam u symbood kongsan da sñiawkmen u wow embynta ha kani ka sngi deiwa yaroh ya kani ka thaw e sikai heiwa da man ko ka thaw wa jan ya ki khynroo khyllood u wan chah hikai ki.
U Rev. CL Susngi leh da e u ki kyntien sneiñ lyngba ka ktien u Blai (Bible) ryngkat i duwai ya kani ka Passing Out Parade wei ya ki kyntien kular ya kiwa chah hikai da yah da u P. Muksor.
Discussion about this post