Jowai: Ka seiñ Jaiñtia National Council (JNC) West Jaiñtia Zone da e por ko 30 sngi ya ki Petrol Pump wa em hapoh ka West Jaiñtia Hills wow thung Manager wa kiwi de ki wa kreh da ki tre jylla.
Ka seiñ ong ko wa da dep li psiah ko cha waroh ki Petrol Pump ka West Jaiñtia Hills wei da chem wa ki tre ki Petrol Pump toh kiwa napoh ka jylla iwa pynsniawphylla ya ka seiñ won wow chem wa kiwa kreh toh ki baarjylla suda.
Kamtæ neiliang ka seiñ da kyntu ko ya kini ki tre Petrol Pump wow pyndam chwa ki ya kini ki baarjylla neibhah kamwa man kattæ boon ki khynroo khyllood wa da biang ka puræ puthi kiwa ye u ksoh ya ki kyrdan Manager wa kiwi de ki kaam we em hapoh kini ki Petrol Pump.
“Lada ki bru yong i ye ki u seiñ ya kam kini ki jait khih ym toh u myllin ki ya ka jait bru wow e khih ya ki bar yow thung ki da ki baarjylla ki wym biang ya ka puræ puthi wei ini pynyoo wa em iyi iyi cha lyndet kawa ye u man wa kiwa kam tre toh leh kaam Benami ki” da ong u President ka seiñ u A.R. Dhar.
Kamtæ ka seiñ da e por ko 30 sngi wow leh yeini, wei lada ym leh ka seiñ daw leh ko da iwa eh.
Heijooh i por ka seiñ e khublei ko leh ya kitu ki Petrol Pump kiwa da thung wa kreh da ki tre jylla kam kiwa e phniang wei da kyntu leh ya ki wow thung ki leh sa ki Manager da ki tre jylla.
Discussion about this post