U Montri Rangbah ka jylla, u Conrad K Sangma ynne da booddien u ya ki thaw wa chah ktah joor bha ha u slap kiwa em ha South Garo Hills District, heiwa u sarokbah National Highway- 62 da chah rah u ha ka um wei la soo sngi kattu ym hoi de u pynemkaam iwa da ktah ya ki 40,000 ngut ki bru khamtam ha Maheskola wa Siju wa kiwi ki thaw wa em ha khappood wa ka Bangladesh ki wym yoh sarok de.
Ha waroh kamwa 6 tylli ki yingkieñ da chah rah ki, iwa kynthup ya ki yingkieñ doi-doi wa ki yingkieñ dieñ ha ka District iwa da ktah leh ya ki Mobile Network wa i bordiñ. I bordiñ da thut i kam ha chnong Baghmara, Karukol, Rongsa Awe, Siju, Rongara, Gasuapara, Chokpot wa kiwi ki chnong.
Hawa booddien ya i man i long namo ka Review Meeting heiyatoh wa i kreh wow chna biang yeiwa da chah ktah, ki sahep na ki chnat sorkar da pyntip ki wa i kreh da man iwa da sdang wei da paan yarap leh na ki chipai ka Indian Air Force wow kit ya ki mar wa emkaam cha Siju wa Maheskola.
Da em hadooh 8 ngut kiwa da dooh yei mynsien yong ki ha i oor khyndaw kam ha Bolsalgre, Siju wa Rongsa Awe wei da em leh uwi u khynnah wa dang 4 snem wa ar ngut kiwa dang wiar na Rongsa Awe.
U Conrad K Sangma daw yachem u wa kiwa hayung yong kiwa da khlaad, heiwa daw lai u cha Siju na Karukol da ka lieñ i wa chimpor kamwa 2.5 kynta wa i lai kjat wa 6 km wow poi cha ki manyung ha Siju wa Rongsa Awe heiwa da pynbna u ya ka poisa yarap wa T. 4 lak uwi uwa khlaad.
Da em hadooh 30 tylli ki chnong kiwa kynthup ya ka Siju, Emangre, Jadi, Nongalbibra, Karukol, Maheskola, Kalu, Kanai, Bonbera, Rongru Asim kiwa da tkut wei da dooh sarok yow lai cha ka District Headquarter ka Baghmara heiwa u Conrad da phah u ya ki sahep wow kreh smat ki khnang wow lait biang ki sarok kamjooh wow pynpoi bordiñ.
Chooh chooh da pyntip wa ha ki 2-3 sngi wow wan daw ye u pynyabi biang ya u sarok NH-62 neibynta ki kari khian wei sa kamwa 20-25 sngi wow lait ki kari heh kam ki truck.
U Conrad da lai pait u leh ya ki thaw wa chah ktah ha Dalu Block, West Garo Hills wei da booddien u yei man i long heiwa du ha Dalu da em 5 tylli ki yingkieñ wa da rah ka um iwa da ktah ya ki chnong wa em hajan ka wah Balka.
