30 tylli na ki 36 tylli ki chnong u yoh ka Meghalaya hei pynbait pood waka Assam: Conrad

U Montri Rangbah ka jylla, u Conrad Sangma ynne hapoh ka yung dorbar da khana u wa ha ki 6 tylli ki thaw wa ya kajia pood wa da rai wow pynbait chwa waka Assam katni ha ka bynta wa nyngkong, da em 36 tylli ki chnong wa da kam da ka Meghalaya heiwa da yoh 30 tylli ki wow em wei wow neh ki hapoh ka jylla Meghalaya.

Ki thaw wa em kajai pood hapoh ka jylla da em ki waroh 12 tylli kiwa kynthup ya ka 1. Tarabari 2. Gizang 3. Hahim 4. Langpih 5. Borduar 6. Boklapara 7. Nongwah-Mawtamur 8. Khanapara-Pillangkata 9. Deshdoomreah, 10. Block-I wa Block-II, 11. Psiar wa Khanduli 12. Ratacherra. Ki ar jylla da mynjur ki leh wym kynthup thymme de ya kiwon kiwon ki thaw palat ya ki 12 tylli ki thaw wa da jep jied hadooh katni.

Na kini da mynjur chwa wow pynbait ya ki thaw wa em ha 1. Tarabari, 2. Gizang, 3. Hahim, 4. Boklapara, 5. Khanapara-Pillangkata wa 6. Ratacherra kiwa man leh kiwa rap suk u pynbait.

U Conrad da pyntip u wa da dep wow yachem wa u Montri Rangbah ka Assam la 6 sien heiyatoh wa ini i kaam wei ki Regional Committee wa da dep chna kiwa em 6 tylli waroh mar le kawi ka jylla da dep ki wow lai hiar lai pait ya ki thaw wa em i kajia pood la 22 sien. Wei hadien ini kini ki Committee da phah ki ya ki jar jiar ki bui (Report) heiwa da pynyabi lang ya kini ki Report kam kawi wei da lai e ka cha ka sorkar India kawa da pdiang da u Home Minister ka India ha ka 31-01-22 wei da pyntip leh yeini cha u Montri Rangbahdooh ka ri.

Related posts

La du Rs. 1 chi churia yoh ka JHADC na ki Cement Factory da ye u su tulop kiwa kreh: Daiapherbha Lamare

December 26, 2024

Kwah u George wow psiah biang cha ka Congress yow yakhun MDC

December 23, 2024

I pynbait thaw man i kamni ha wah:

West Khasi Hills District

1. Tarabari Area: Da em 8 tylli ki chnong wa da kam da ka Meghalaya wa kynthup ya ka 1. Upper Tarabari/ Walkam, 2. Rangkhet, 3. Thangkhola, 4. Chingipa/Chiginde, 5. Doini-Charadonu, 6. Dapbolpara, 7. Balkam wa 8. Malang Salbari. Na kini, waroh 8 tylli ki chnong u em ki hapoh ka Meghalaya.
2. Gizang Area: Hapoh ini da em 3 tylli ki chnong heiwa ka Amagaon wa Gohanimara u neh ko hapoh ka Meghalaya katwa ka Malsapara deilang waka Gizang Reserve Forest u haap ki hapoh Assam.
3. Hahim Area: Hapoh ini, da em 12 tylli ki chnong wa da kam da ka Meghalaya kitæ toh 1. Rongthali, 2. Ranighat 3. Athiabari 4. Thamnaguri/Sonakuri 5. Mathaphuta/Umshiak 6. Maspara 7. Moipara, 8. Malapara/ Nalapara 9. Simrang (Umsaitwait) 10. Simrang/Salpara 11. Lejadubi u wan noh ki cha ka Meghalaya katwa ka chnong Thutiapara/Thutia Bazar u lai ko cha ka Assam.

Ri-Bhoi District

1. Boklapara Area: Na ki ar tylli ki chnong wa da kam da ka Meghlaya; du ka Boklapara wow neh hapoh Meghalaya katwa ka Jimrigaon u lai ko cha Assam.
2. Khanapara-Pillangkata Area: Ha Khanapara-Pillangkata ki bynta ka chnong Maikhuli, Pillangkata wa Borpathar Stone Quarry u lai ki cha Meghalaya. Chooh chooh ha Khanapara da mynjur wa ka ASTC Transit Camp hadooh ka Police Out Post, Namghar, ki thaw wa chong da ki Assamese ki bynta ka 1) Khanapara wa Dreamland Resort u lai ki cha ka Assam. Kiwa sah won kiwa kynthup nadooh ki yung ka Brahmaputra Realtors Pvt. Ltd. u em ki hapoh Meghalaya. Ha thaaiñ Patarkuchi, ki thaw wa chong da ki jaitbru ka Meghalaya kamjooh ki thaw wa kyntang yong ki heiyatoh waka niam deilang waka dustur riti u lai ki cha ka Meghalaya manda leh ya ka sorjamin wa bniah. Ha ka thaaiñ Maikhuli, Muamari Beel kiwa yabi waka madan Maikhuli u neh ki waka Assam katwa ka thaw tlep-bru ha Maikhuli u neh ko waka Meghalaya.

East Jaintia Hills District:

1. Ratacherra Area: Na ki 5 tylli ki chnong, ki le tylli wa kynthup ya ka Malidor, Ratacherra wa Border Umperdit u neh ki ha Meghalaya. Kiwa sah wa kynthup ya ka chnong Baleswar Grant Revenue (Ratacharagaon, Natanpur Tea Garden wa Jalapur Tea Garden) u neh ki waka Assam.

Ini mut wa na ki 36 tylli ki chnong wa da kam da ka Meghalaya ha u snem 2011, 30 tylli u lai ki waroh cha ka Meghlaya (em wa lai waroh wa kiwa da ki bynta) kiwa man kamni ha wah wei i heh i thaw kini ki 6 tylli ki thaw wa da ye u pynbait da em i 36.79 sq.km wei kamwa 18 sq.km u lai cha ka Meghalaya wa kamwa 18 sq.km u lai cha ka Assam.