U Montri Rangbah ka jylla, u Conrad K Sangma hawa e yei klam hapoh ka yung dorbar chna aiñ ka jylla ynne ka sngi heiyatoh wa iwa jia ha ka 19 tarik ha Shillong, da pyntip u wa neiliang u DC ka District da e bor u wow pynman ya kani ka Black Flag Rally deiwa kular ka KSU wa kani ka Rally u man ko kawa jai jai.
Tangwa ha i por wa pynman Rally da em ki bru kiwa kawang moo ya 31 tylli ki kari hadooh wow dat u choh ya ki paidbah.
Na ki kari wa chah ktah da em 8 tylli kiwa em Number Assam. Ki bru wa mynsoo da em ki 18 ngut kiwa da kit cha Shillong Civil Hospital.
U Conrad da pyntip u wa ha kani ka jooh ka miet da lai kem ya u President, Vice President wa u General Secretary ka KSU deiwa pynngat ki hapoh kiwa boon ki kyndon ka BNSS wa ka aiñ Meghalaya Maintenance of Public Order Act.
Da em leh 15 tylli ki FIR wa da booh heiyatoh wa iwa jia wei da tipmit ya 5 ngut ki bru wa kah durkhmat kiwa emkti ha iwa jia ha ka 19 tarik khamtam kiwa tba kti ya ki kari heiwa uwi na ki dadep kem oo.
Da khana u leh yeiwa da yachem hapyrdi ki ar sorkar yow ye u pyndooh pyndam yei khang sarok iwa da pynthut yei lai i wan hapyrdi ki ar jylla najrong wa da thung leh ki Committee wa daw man dkhot da ki heh sorkar deilang ki seiñ kiwa kamai kari ka Assam wa Meghalaya.
Da ong u leh wa ka sorkar ym e laad ko ya waroh kiwa emkti ha ini i kaam khlem da chah pynchitom heiwa da thung da ka SIT ka wow takit yeini.
Uwa yahkhmat ka Liang Pyrchah, u Dr. Mukul Sangma da ong u wa lada e laad ya kam kini ki bru khlem da pynchitom, daw pynchlur ko ya kiwi wow leh yei jooh deiwa pynthut ya ka imlang sahlang najrong wa pynsih yei dur i dar wa i pyrtuid ka jylla.
Discussion about this post