Ka yung krehkaam ka DC, East Khasi deiwa ya krehlang wa u DM&HO ka East Khasi Hills da pynman ki ya ka e tika yada COVID-19 wa ar sngi namo ka Mega Vaccination Drive ha ka 14 wa 15 tarik uni u bnai ha waroh ki Polling Station ka 13-Mawryngkneng wa 24-Mawphlang Constituency deiwa pynkrehkaam ya ki bru heipor wa pynman Election.
Ha kini ki ar sngi da pynman leh ya ka chondur Aadhaar wa i thap pyrtuid ya kiwa kreh mylla hapoh ka e-Shram ha ki kattu katni ki thaw.
Yow pynchlur ya ki bru, da pynman leh ya ki pynbna ha ki chnong, ki dong lyngba ki waheh chnong wa kiwa yahkhmat ki niam, ki yalehke Street Play da ka Martin Luther University wa ki khynnah ka St. Anthony’s College wei da saam leh ya ki kot lakdop kiwa pynsñiawthooh chaphang i tika. Da lai leh na iwi i yung cha iwi, cha ki thaw wa kreh wa cha ki yaw ki haat yow e tika.
Yei e tika da leh nadooh 6:30 i step hadooh 4 waje i janmiet heiwa da chimbynta lang da 400 ngut ki wakreh sorkar.
Ha Mawryngkneng da em waroh 1715 ngut kiwa da wan wow chim tika katwa ha Mawphlang da em 1857 ngut.
Heiyatoh wa u Aadhaar ha Mawryngkneng da em 1809 ngut kiwa da wan yaleh katwa ha Mawphlang da em 1213 ngut.
Kiwa wan wow thap pyrtuid hapoh ka e-Shram ha Mawryngkneng da em ki 1407 ngut wa ha Mawphlang 866 ngut.
Ha kini ki ar sngi waroh da em 3572 ngut kiwa da chim tika wa kynthup ya kiwa pyndep yei sien wa ar, 3022 ngut kiwa wan leh Aadhaar wa 2273 ngut kiwa da leh e-Shram. Ya ini i jooh daw leh leh ha kiwi ki Block ka District yow ye u yada na ka la-ær wa le.
