U Lat ka jylla Meghalaya, u Satya Pal Malik kam chibynta wow wai ya ka Dorbar Mang Tangka 2022 ka Meghalaya Legislative Assembly ynnin ka sngi, da e u ya ka Governor’s Address yow khana ya ki kaam wa da leh ka sorkar heiwa najrong kiwa boon ki kaam wa da leh da kdaw u yei em ki 38 tylli ki kreh wa da pynkreh hapoh ka jylla hapoh ka Non Lapsable Central Pool of Resources (NLCPR) kiwa da chongdor T. 802 klur.
Da khana u wa ha uni u snem mang tangka wa katni, ka Ministry of DONER da pynlait poisa ko T. 44.44 klur wei kiwa da pynkreh hapoh ka NLCPR kynthup ko ya ka Shillong International Centre for Performing Arts & Culture (SICPAC), ka sarok Rongjeng Mangsang Adokgre Road waka College of Science & Commerce ha Mawphlang wa Mahendraganj.
Neibynta ka SICPAC da pynlait ya ka poisa wa T. 131 klur da ka Ministry wei da dep wow pynchna hadooh 98% wei da booh wow pyndep chna ha u Naiynru uni u snem. Ya u sarok Rongjeng Mangsang Adokgre Road nadooh 0-32 Km wa 39-43 Km da pynlait poisa T. 123 klur wei da booh por wow pyndep u chna ha u Kmaichonglad (Dec), 2022.
Hapoh ka North-East Special Infrastructure Development Scheme, ka Ministry of DONER da mang poisa ko neibynta ki 10 tylli ki kreh hei dor wa T. 253 klur. Heiwa ka Ministry da pynlait ko T. 52.74 klur neibynta u snem mang tangka 2021-2022.
Chooh da pyntip wa ka Ministry da tyrwa ko leh wow sdang ya 3 tylli ki kreh wa thymme hapoh ka NESIDS hei lut wa T. 144 klur wei kini kynthup ki ya u sarok wa lai na Shillong cha Umroi Airport hei lut wa T. 50 klur, i chna pynheh ya u sarok Agia-Medhipara-Phulbari-Tura Road hei lut wa T. 66 klur wei yow booh ya ka State of the Art Diagnostic Centre ha Tura hei dor wa T. 27 klur.
Puræ leh: 107 tylli ki kreh yoh ka Meghalaya naka MDONER, 38 tylli kiwa dang sah khlem pyndep
