Ka 3rd Division wa tip leh kam ka 3rd U Adelbert Laloo Memorial Trophy wa pynman da ka West Jaiñtia District Sports Association (WJDSA) da pteiñ biang ya ka ynne ka sngi da ar tylli ki yalehke.
Ha ka yalehke wa nyngkong, ka Iooksi Youth Welfare da jop ko yaka Moodymmai da 3-1.
Ya ka Iooksi Youth Welfare da thap kool da u Pyrkhat Paslein ha ka minit wa 36, u Ngaitmi Syngkon haka minit wa 56 wa u Pyrshang Tangliang haka minit wa 62 katwa yaka Moodymmai da thap kool da u Teimi Passah haka minit wa 29.
Ha ka yalehke wa bood, ka Rising Sun Mukhla da jop ko yaka Mookynphad Mihmyntdu da 5-0 lyngba ki kool wa thap u Melvin Lyngdoh haka minit wa 17 wa 39, u Nathan Suna haka minit wa 61, u Pynyoo Bang haka minit wa 69 wa u Chembun Suna haka minit wa 70.
Mynstep u pynman soo tylli ki yalehke kiwa daw sdang da ka Mookaswan Dongneiñ waka Newhill heipor 10:30 i step, ka Khliehchnong Ialong waka Salaroh heipor 12:00 waje pyrdi sngi, ka Samaro waka Mulang Ialong heipor 1:30 i sngi wei daw pynut da ka Nangbah Khloopano waka Madan Thadmuthlong heipor 3:00 waje.
Discussion about this post