Ka 3rd Division Football Tournament ka West Jaiñtia District Sports Association (WJDSA) wa tip leh kam ka 3rd U Adelbert Laloo Memorial Trophy da pteiñ ya ka ynne ka sngi da le tylli biang ki yalehke.
Ha ka yalehke wa nyngkong, ka Lumbhahdakha da jop ko ya ka Moodop Royal da 3-0 lyngba ki kool wa thap u Gideon Mukhim ha ka minit wa 12 wa u Cleverson Lyngdoh ha ka minit wa 41 wa 64.
Ha ka yalehke wa ar, ka Riatsaliya Mihmyntdu da jop ko ya ka Catholic Youth Mihmyntdu da 2-0 da ki kool wa thap u Iohhi Chyrmang ha ka minit wa 20 wa 38.
Ha ka yalehke wa le won ka Mookyrdup da jop ko ya ka Mupliang da 2-1.
Ya ki kool ka Mookyrdup da thap da u Nickyboy Swer ha ka minit wa 41 wa 60 katwa ya ka Mupliang da thap da u Byforce Star Dhar ha ka minit wa 44.
Ki yalehke mynstep u man ko hapyrdi ka Umchangiar waka Sohmynting Dongnein heipor 12:30 i sngi, ka Pateiñki Sabah waka Khliehmyntdu Neinchnong Mihmyntdu heipor 2:00 waje wei daw pynkut da ka Nangbah Mooknor waka Lumkhangdong Kyndongtuber heipor 3:30 i sngi.
