Ha ka kyrwoh na uwa e ktien ka NPP Meghalaya, u Nickey Nongkhlaw, da ong wa 8 snem wa ka sorkar Congress wa yahkhmat da u Mukul Sangma da em ko hei bor, ka jylla 4 bnai chi snem da chah pyndooh bordiñ bait ko man-ka-sngi wei ini leh toh ha i por wa em Exam bait ki khynnah. Ini mut wa 3,840 kynta lane 160 sngi wa khlem bordiñ neibynta ki bru ka Meghalaya iwa leh chynnam ka Congress. Tangwa katni won u Mukul da batai u kammon wow pynlai ya ka chnat bordiñ.
Ka NPP da ong ko wa u Mukul wa u Zenith katni da yaleh bha ki wow pynkylla yei dur yong ki hakhmat ki paidbah hajrong ini i kaam deiwa pynbiej bru hadien wa ini wadep da hap wow pynkylla yei krehkaam ka Congress neidaw wa u Mukul da leh u ya ka Party katwa mon u heiwa da thung noh da u Vincent Pala kam uwa pait ya ka Party iwa da pynman ya u Mukul wow khuslai wa neini chakhmat ym man de u kam i durkhmat ka Party kamtæ kini ki chipayu katni da yaleh ki katwa ye yow yoh yei ngaitnood ki paidbah.
Da kdaw leh wa u Mukul wa Zenith iwa ka-it dooh ki u yaklam toh hajrong ka MeECL kawa dadep lute ki la 8 snem, tangwa u Zenith ha kiwa thoh khubor da klam u yei e wai ya ka MeECL cha ki Company ki bru samen, hanla u Montri Rangbah da klam che u wa ym e wai ya iwon iwon i yong ka MeECL cha kiwon kiwon. Kamtæ i klam u Zenith chaphang ka NITCON toh iwa da yoo danda wei khlem da pynkhreh bha chwa wow yaklam wa kiwa thoh khubor deiwa pynpoor yei thok ka Congress.
Ka NPP da ong ko wa u Zenith hawa klam u wa kiwa thoh khubor da ong u wa ka NITCON toh ka Company sorkar namo ka Public Sector Undertaking (PSU), tangwa heijooh i por da ong u wa daw e wai ka sorkar cha ki Company ki bru samen, “Kopsar u Zenith ym tip u iyi yaphær hapyrdi ka Company sorkar wa ka Company ki bru samen.”
Chooh chooh ka NPP da ong ko wa ka Congress Party ha u 2017, heipor wa ka Congress emko hei bor, u Mukul Sangma da mut u wow e ya ka MeECL cha ki bru samen deiwa soi soskular wa ka Renew Joule Private Ltd. yow e cha ka yei bor wow booh ya ki thaw pynmih bordiñ. Heiwa u Mukul da jied u ya ka Ri-Bhoi District, Mendipathar wa Ampati wow leh ya ini. Ha u jooh u snem da soi soskular u wa ka ETA Star Infrastructure Ltd, Brijraj Power Metallics Ltd. wa MSGC Power Ltd yow chimkti ki ya ki thaw pynmih bordiñ wa khian ka MeECL. U Mukul da e u leh chiboon ka poisa ka MeECL cha kini ki Company iwa da pynsah ram hadooh wa da tkoh kani ka chnat sorkar.
Kamtæ da ong wa kini ki arnut chipayu lada ym ye ki wow klam yei hok deiwa pteiñ du wow yahbakla ya ki paidbah wei lada dang em ki yei burom ya idæ ym toh de tang wow yieñ Election ki. Katni manda em ki ha ka liang pyrchah, i thrang yong ki toh du wow yoh yei bor synchaar tangwa toh u chong pyrkhat ki yei kaam yong ki kam kiwa em ha ka liang pyrchah kiwa para ki leh da chem chitom ki du nei yachoh yachruit para ki wei na ini i daw ka Congress da sdang wiar ko na ka Map ka India.