Ka Seiñraij Jowai lyngba kiwa yahkhmat yong ka wa kynthup ya u O.R. Challam, President, u A. Sumer, General Secretary ynne ka sngi da pynbna paidbah ki wa ka Behdieñkhlam ha uni u snem leh u man hi ko kawa lai bait lai ryntih nadooh ka 8 hadooh ka 11 tarik uni u bnai deiwa bood ryntih ya ki kyndon ka sorkar hajrong u yada nei poor ka khlam COVID-19 kawa da poor ha ki jylla ka ri wa ka pyrthai hi waroh kawi, wei ha uni snem leh ym chah ya ki paidbah u wan paitke.
“I pyndep ya ka Behdieñkhlam ha uni u snem rap kyrpang ko neibhah wa man ko leh chibynta i dap 50 snem ka jylla kamjooh i dap 75 snem wa yoh laitluid ka ri India, ha chirup i krehlang waka Ministry of Culture waka chnat Art & Culture ka sorkar jylla,” ong u President ka Seinraij u O.R. Challam.
Khana u wa neiliang kini ki chnat krehkaam leh da dep pynpoi ki yaki phang pyrdi namo ka Theme cha ka Seinraij wei yoo luti ki wa ki rot wow chna ha kani ka Behdeiñkhlam u rap kyruiñ cha ka Theme wada yoh na kitai ki chnat krehkaam.
Chooh chooh da ong u wa ini i lehkmen deilang wa i dap 50 snem ka jylla u kut ko haka 21-01-22, katwa yei dap 75 snem i yoh laitlooid ka ri u kut ko haka 15-08-22.
Ka Seinraij Jowai da pyntip haroh ko wa du ya kitu wada pyndep yei chim tika u chah wow embynta ki ha lehniam Behdeiñkhlam waphær waphær, kamjooh leh wot ya kitu kiwa pyndep niam ha jar jiar ki yung ki sem.
Khnang yow ye u bood ryntih yaki kyndon wow jngai uwi yow wi, ka Seinraij da booh kyndon haroh ko ya waroh ki 7 tylli ki dong wa haap hapoh ka Seiñraij Jowai wow jied ki du 40 ngut chi dong u chimbynta ha ka Behdieñkhlam ha jar jiar ki thaw, katwa yaka Dieñkhlam toh u rah du hapoh 13 ngut, wei waroh kini ki wow embynta toh kiwa da yoh tika.
Neitæ ki dong wa hap emkaam bru na baar won heiyatoh u pyndep yaka Behdieñkhlam kam heiwa choh bom, put bhuri wa kiwi, emkaam u man kiwa da dep yoh tika, wei la toh ki wym pu em dep e tika won toh u phah Test Covid ki chwa wow leh ki yei kaam.
Heiyatoh wa ki kaam niam haki soo sngi le yaw yong ka Behdieñkhlam, u Puramon Kynjing, Dolloi ka Elaka Jowai khana u wa i pyndep niam ha kani ka kynti phær ko na ki snem nachwa neidaw wa ki paidbah wym yohlaad de ki u embynta neidaw wada pynkhreh katkam ka aiñ wow pynduna i boon bru.
“I pyndep niam ha uni u snem man khroo man kyntang ko neibhah wa da pyndep deilang ki aiñ bru waki aiñ Blai,”ong u Dolloi.
Chooh chooh ong u wa ha uni u snem waroh i lehniam daw pyndep lut, kynthup nadooh ki chaad, i rah Dieñkhlam, i rah rong wa kiwi, lait noh i yoh bynta ki khon ka Raij wa em cha baar ka District.
Heijooh i por i rah ya ki rong wa jrong wa ki Deiñkhlam wa heh, ym yoh de ha uni u snem neidaw wa hap pynduna ya ki bru, i ya knieh khnong ha Aitnar leh wym em de ha uni u snem, heiwa u rah du yaka Symbood Khnong wei u em ka ngooh ka dem.
U Dolloi da pyn-eh bok, pyn-eh nasib u ya ki khon yong ka Elaka kamjooh ka Raij, wei ong u leh hanla ki paidbah wym yoh de ki u chimbynta kamwa jooh man leh tangwa i lehkmen u pyndap ko yei mynsien yong ki paidbah lada em ki ha kawon kawon ka thaw, wei kitu kiwa yoh bynta u pyndep leh ym du kat neibynta yong ki samen tangwa neibynta waroh lang, neitæ won uwon uwon wa chimbynta haka lehniam Behdieñkhlam nadooh u Dolloi, ki Langdoh, ki Pator, ki Sangot wa kiwi toh kiwa chakri neibynta uwa boon wa lang.
