U MLA ka Mawlai Constituency u Process T Sawkmie da yaklam u wa u CEO ka Shillong Municipal Board (SMB) wow phah pynsangeh chisyndon ya ka Jowai Municipal Board (JMB) yei lai noh jhep ko cha Marten kawa em ha Mawlai Mawiong.
Da pynsñiaw u yei sñiawkhia wa joor hajrong i wan noh jhep ka Jowai Municipal Board wa da pynlang na chnong Jowai cha Marten, wei da pyntip u leh wa daw thoh smat u cha ki bor wa toh u pait wow phah pynsangeh noh neibhah ka Mawlai ym toh ka thaw wow wan noh jhep na kylleiñ, najrong wa da jan dap wei da pynmih leh yei smatung wa da ktah ya i chait i khiah ym du ya kiwa chong chnong ka Mawlai tangwa ya waroh kitu kiwa lai lyngba ka sarok nakhmat ka Marten.
Da ong u wa katkam i pyntip u CEO ka SMB, i noh yei jhep toh iwa du chisien, wei neiliang u Process da ong u wa lada ini noh jhep ym pynsangeh, ym banse wow ong ya ki paidbah wow phah yang wei wow pynuiñ ya ki kari kiwa wan na baar kiwa thmu wow lai noh jhep ha Marten.
