Ka All Meghalaya Karate-Do Association da liwan ko deiwa yoh chiboon ki takma ha ka 19th All India Independence Cup Karate Championship wa da pynman ha New Delhi ha uni u bnai.
Da em 35 ngut kiwa yoh takma kiwa dapoi 41 tylli kiwa kynthup ya ka 10 tylli ki takma ksiar, 16 tylli ki takma rupa wa 15 tylli ki takma tama ha ki le sngi wa da pynman ya kani ka lympung nadooh ka 8 hadooh ka 10 tarik uni u bnai.
Ka Meghalaya da phah ko 57 ngut kiwa yalehke kiwa yahkhmat da u Donboklang Lyngdoh, u Greater EM Kharpuri wa u Pynhunlang Kharbuli.
Da em 6 ngut kiwa da yoh mar ar tylli ki takma katwa 29 ngut won kiwa da yoh ki mar kawi. Kiwa yoh ar tylli toh ka Dominica Phidahun Kharbani (kawi ka takma rupa wa kawi ka tama), u Esaranaki Kharjana (kawi ka takma ksiar wa kawi ka rupa), u Ferrando Wanniang (kawi ka takma ksiar wa kawi ka tama), u Mebapynhun Marngar (kawi ka takma rupa wa kawi ka tama), u Nathaniel Levin Suting (kawi ka takma ksiar wa kawi ka rupa) wa ka Xenia Rose Nongsiej (ar tylli ki takma rupa).
Ki 10 ngut kiwa yoh takma ksiar toh ka Audrella Carisa Marbaniang, u Aventinus George Mylliem, u Eric Banteinam Ryngnga, u Esaranaki Kharjana, u Fadrik Wanniang, u Ferrando Wanniang, u Garret Ivan Lyngdoh, ka Lapyntngen Mary Lamin, u Nathaniel Levin Suting wa u Samuel Kurbah.
Ka Meghalaya da yoh takma ko ha ki yalehke Kumite wa Kata.
Neiliang ka AMKA da e khublei ko ya waroh kiwa yoh takma kamjooh yei kreh chitom ki ha kani ka Championship.
Discussion about this post