Ynne ka sngi u Executive Member ka JHADC wa pait ya ka chnat yaaw, u Evening Star Teron da lai pait lai sylli u ya ki dukan wa da chah baam ha i diñ ha Iaw Thymme, Dongmihsngi, Ladthadlaboh Jowai iwa da jia ynnin i janmiet.
Da pyntip u leh wa ha ini i jia, i diñ da baam ktah i hadooh 42 tylli ki dukan wei da chah ktah leh ki 3 tylli ki kudam booh ktung.
U EM da ong u leh wa man i jia iwa sñiawsih iwa da jia neipor cheipor kawa khlem poipyrkhat.
Heiyatoh wa kammon u leh wei kat mynnu u sdang u chna biang ya kini ki dukan, neiliang yong oo da pyntip u wa hadien wa yoh ya ka bui (Report) na ki sahep ka chnat, heitæ daw rah ya ini i kaam wow yaklam hapoh ka Executive Committee ka Council.
