Ka Federation of Khasi Jaiñtia and Garo People (FKJGP) da chem ko wa 44 tylli ki chnong hapoh sor Shillong dih ki da ka um ka wym chngaaiñ (Unsafe) ki wym poi katkam ki kyndon wa da booh da ka Food Safety and Standards Authority of India (FSSAI).
Ha ka 22 tarik u Naisaphra, ka FKJGP da pynlang ko ya ka um na ki 46 tylli ki chnong ha Shillong wei da phah Test ya ki ha ka State Food Testing Laboratory, Commissionerate of Food Safety kawa em ha Pasteur, Shillong wow tip yei man i long ka um wa dih ki bru heiwa da chem 44 tylli toh ki wym man chngaaiñ de wow pynemkaam.
Ki ar tylli ki chnong wa dang miat ka um toh ka Demthring waka Mawblei donhi.
Heiyatoh wa ini, ki heh ka FKJGP da yachem ko ya u Montri Rangbah ka jylla, u Conrad K Sangma yow e kti ya kani ka Report deiwa kyntu ya oo wow chimkhia ya i saam um ka chnat PHE ha kylleiñ ka jylla.
U President ka FKJGP, u Dundee Khongsit da pyntip u wa ha kini ki 44 tylli ki chong wym miat de ka um toh neidaw em i jakhlia wa ki khñiang Bacteria kam ki Coliform wa E. Coli Organism wei ka pH leh toh kawa heh iwa da pynman ya ka um wow man Acidic ko.
Katkam ki kyndon ka FSSAI ka pH Level kawa biang toh 6.5 hadooh 8.5 wei hapoh ka 6.5 ka um ym miat ko neidaw wa da man Acidic ko.
Chooh chooh da ong wa lada pynemkaam ya kani ka um daw yah ko cha ki kjut kam ka Diarrhea, Hemorrhagic Colitis, Hemolytic Uremic Syndrome, Respiratory Illness, Pneumonia wa kiwi kiwi de i kjut kam ka Meningitis, Septicemia wa Urinary Tract kiwa ye chim yei mynsien ki khynnah khian wa ki tymmen.
Discussion about this post