Da ki spah ngut kiwa yaleh Table Tennis ka India daw wan ki cha Shillong yow chibynta ha ka 83rd Senior National Table Tennis Championship kawa daw sdang ha kani ka 18 tarik.
Ya kani ka lympung daw pynman ha ka Indoor Training Centre ka Sports Authority of India kawa em ha Indoor Training Centre ka North-Eastern Hill University (NEHU) Campus, heiwa da yooluti wa ka Manika Batra, Sathiyan Gnanasekaran, Sutirtha Mukherjee waka Achanta Sharath Kamal daw wan ki wow chimbynta. Neiliang ka Meghalaya daw phah ko 14 ngut wa kynthup ya ka North East Olympics 2018 Gold Medallist, ka Tanushree Das Gupta.
Neiliang u Vice-President wa Chairman ka Organising Committee ka Meghalaya Table Tennis Association (MTTA), u Bruce P Marak hawa yaklam wa kiwa thoh khubor ynne ka sngi da pyntip u wa kani toh ka lympung yaleh Sports wa heh dooh wa pynman ha Meghalaya heiwa da yooluti daw wan 450 ngut kiwa yaleh Table Tennis deilang wa 200 ngut ki Coach wei daw wan leh kiwa mihkhmat ka Table Tennis Federation of India.
Kani ka Championship toh kawa da thmu wow pynman ha u Duyatra (Jan) uni u snem tangwa neidaw wa em ka khlam COVID-19 da hap wow rah tarik ka wei kani man ko leh kam chibynta i lehkmen dap 50 snem ka Meghalaya.
Kiwa yalehke ka Meghalaya kyntup ki 7 ngut ki chynrang wa 7 ngut ki kynthai. Ki chynrang toh u Suranjit Dey, u Anubhav Dutta, u T Yogesh Singh, u Rituraj Shabong, u Z Somiyar, u Sumesh Gareri wa u Prithvi Dey. Ki kynthai won toh ka Tanushree Das Gupta, ka Camelia Diengdoh, ka Anwesha Choudhury, ka Wanpyntngen Lyngdoh, ka Diva Tang, ka Chuana R Marak wa ka Badaihun Diengdoh.
