15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1

5 lak ngut kiwa yoh yarap naka poisa wa pynlut wow yakhun yaka khlam: Conrad

U Montri Rangbah ka jylla u Conrad K Sangma hapoh ka yung dorbar ynne ka sngi hawa e yei jubab heiyatoh wa i pynlut hawa yaleh pyrchah yaka khlam COVID-19, da ong u wa nadooh ki ri kiwa da roi da paar bha hadooh ki jylla wa da roi da paar bha hapoh ka ri da chem chitom ki wow yaleh ya iwa eh wa da wanrah ka khlam, tangwa ka sorkar jylla da ye ko wow yieñ kamjooh wow yachem ya waroh iwa eh mar dei khmat heiwa hadooh u Naiynru ka jylla da man ko kawi na ki jylla kiwa duna dooh wa yoh COVID-19 wei hadooh katni dang pteiñ hi yeini.

Da khana u leh wa i bor wa ye u leh Test da ku na 30 cha palat 2000 tylli ki sngi wei hadooh katni da dep wow leh hadooh 2.14 lak tylli ki Test.

Da pyntip u leh wa naka T. 399 klur wa da pynlut neibynta wow yakhun yaka khlam, T. 271 klur toh wa da pynlut naka Health Depart wa kynthup yaka Directorate of Health Services waka National Health Mission.

Kiwa da pynlut man ki kamni ha wah:

Da dep wow su T. 251 klur ka Bill wei dang sah T. 148 klur kawa ym pu em su wei nalor wow sai naka poisa ka sorkar jylla da sai leh na kiwi ki chnat kiwa man kamni ha wah:

Da khana u leh wa ha kini ki 2 bnai, ka jylla da ye ko wow booh ya 2 tylli ki BSL Laboratories kiwa em ha Tura wa ha Pasteur Institute, Shillong wei ha kini ki ar thaw da ye wow leh hadooh 52,804 tylli ki RT-PCR Test.

Yow ye u leh ya ki Test paidbah da booh 75 tylli ki Rapid Response Team hapoh ka jylla wei da thung 407 ngut ki bru wakreh hawa yatoh wow leh ya kini ki kaam kiwa pait leh yaki Containment Zones haki thaw wa em ki, wei i lut wow su ya ki wakreh Contract da poi ko T. 15 klur deiwa kheiñ won sa i bai leh Test wa kynthup yaka bai Laboratory da poi ko T. 38.9 klur.

Da pynlut leh T. 30.8 klur wow booh yaki Corona Care Centres kiwa em 25 tylli kiwa em 1205 tylli ki thaw thiah. Nalor ki Corona Care Centre, da booh 601 tylli ki thaw thiah yow booh samen samen ki bru ha ki 20 tylli ki Hospital ka jylla.

Neibynta ki wakreh Health yow booh thaw yaki wow leh Qurantine ki, da su T. 2.67 klur cha ki Hotel wa ki Guest House iwa da yarap leh wow pynyoh kreh yaki Hotel wa ki Guest House.

Da pynkynmoo u leh wa da dep thied ya 55 tylli ki Ambulance wei da phah thied leh yaki kari kit metyap namo ki Mortuary Van neibynta kawi pa kawi ka District heiwa 4 tylli da dep booh ha East Khasi Hills, West Jaiñtia Hills, West Garo Hills wa ha North Garo Hills wei kiwa sah daw li booh ha chwa u kut uni u bnai. Na ki 158 tylli ki Ambulance kiwa em haka jylla wa kyntup ki yong ka ‘108’, 25 tylli toh kiwa da dep kylliang wa sa 30 tylli da booh ha kiwa boon ki thaw hapoh ka jylla.

Ya kiwa liwan chapoh ka jylla tangwa neidaw wa em ka Lockdown te da sahkut ki, ka sorkar da su ko T. 3000 samen cha 10,049 ngut iwa da poi i lut cha T. 3.01 klur.

Hadien wa wai yaka Lockdown, lyngba ki 14 tylli ki Special Train, ka sorkar da pynlut ko T. 2.85 klur yow wanrah ya ki bru ka jylla kamjooh neibynta ka leh Quarantine ki. Katwa yow thied yaki tiar wa emkaam kiwa leh yaka Home Quarantine kiwa tip kam ki Provision Kit, kiwa da em 32,555 tylli, da poi ko T. 6.11 klur.

Neibynta ki Community Quarantine Centre da su T. 10,000 kawi iwa da poi waroh T. 15 klur.

Ya kitu kiwa khih mylla kiwa em hapoh ka Building & Other Construction Workers Welfare Board da e T. 1000 chi tayaw neibynta ka 3 tayaw cha kamwa 25,700 ngut kiwa yoh myntoi iwa da poi T. 12.90 klur.

Cha kiwi won kiwa khih mylla kiwa ym em hapoh kiwon kiwon ki seiñ, da e yarap T. 700 chi tayaw ya 3 tayaw wei da su T. 38.1 klur.

Naka MLA Scheme katkam ki kyndon ka SRWO waka SUWP da e T. 25 lak cha uwi pa uwi u MLA yow e yarap wa iwa yatoh wa u COVID.

Kamtæ u Conrad da ong u wa lyngba kini waroh da ye wow yarap cha kamwa 5 lak ngut ki bru iwa man 15% na waroh ki bru wa em hapoh ka jylla wei da ngait skem u wa ym em pynlut bakla yaka poisa ha kini ki 7 bnai wei da booh pathan ko hei thaw wa biang yaka jylla neibynta ki bnai wa daw wan.

Advertisement ad1
Share this:
Previous

Da sdang krehkaam u Helpline 14410 wow e yarap heiyatoh wa u COVID-19

Next

67 ngut kiwa dang yoh wa 129 ngut kiwa dang chait na u COVID-19 ha Meghalaya