Hadien wa chah pynmynsoo ki 8 ngut kiwa mylla ka St. Xavier’s kawa em ha Umoid, South West Khasi Hills, wei da dooh leh yei mynsien yong uwi, neiliang ki pulit da pynman ki yei thooh wa joor yaki damok wa emkti, wei hadooh ynne ka sngi da yoh kem ya 5 ngut heiyatoh wa ini i jia.
U Montri wa pait yaka chnat Kaam Pohyung ka jylla, u Lahkmen Rymbui ynne ka sngi da pyntip u wa hadien itai i jia, neiliang ka sorkar da phah ko ya ki pulit wow thooh ya ki damok, wei ynnin ka sngi da yoh wow kem ya le ngut kiwa suba emkti wei ynne ka sngi leh da kem biang sa arngut heiwa ki pulit da pynman ki yei takit ya kitai ki bru.
Hawa kylli, u Rymbui da kyntait u wow ong wa emkti da kiwon kiwon ki kynhun, tangwa da ong u wa hadien ka takit daw tip kiyi wa emkti wei ya i daw yong i thombor.
Hawa yatoh wa i chah thombor wa man i por yong kiwa mylla, khamtam kiwa mylla wa wan na baar jylla kamwa da jia leh ha West Khasi Hills ya ki wakreh wow chna ya ka Eklavya Residential School, neiliang u Rymbui da pyntip u wa ka sorkar da phah ko ya waroh ki chnat wow man kiwa paitbniah bha khamtam ha ki thaw wa em ki wakreh kiwa boon yow yada na kam ini i jia.
Ha iwi won i liang, u Rymbui da beiñ u ya ini i jia, deiwa ong wa ki bru kiwa leh ya ki kaam damok, ka aiñ ym maap ko. Da ong leh wa lada em da kiwi ki rukom pyrkhat toh u pynsñiaw cha ki chkoor yong kiwa haneiñ ym toh wow thombor næ chim ya ka aiñ ha kti.
