Ka sorkar jylla ynne ka sngi da rai ko wow pynlut T. 1.45 klur chi snem neibynta wow khroh ya ki sahep wa haap ha ka All India Service Officers (AISO) wow kreh ki rap boon kynta (hadooh 15 kynta chi sngi) deiwa pynuiñ hadooh 95% ka Income Tax wa ki sahep su ki.
U Symbood Montri Rangbah, u Prestone Tynsong da ong u wa du ha ka jylla Meghalaya wa da chim ya ini i rai wei u krehkaam ko nadooh ka mang tyngka wow wan. Da ong u wa i rai ka sorkar kamni toh wa kwah ko wow e myntoi ya ki sahep kiwa wan na baar jylla.
Heijooh i por u Prestone da pyntip u leh wa ka sorkar daw pynuiñ noh ko 95% cha kiwa wan kreh ha ki chnat ka sorkar jylla kiwa sah cha baar kiwa haap su ya ka Income Tax, neibynta ini ka sorkar dang hap chim yukheiñ ko.
Hawa kylli hajrong ini i pynuiñ ka sorkar ya ka poisa ki sahep hajrong wa yoh ki ya ka tulop wa heh hawa nujor wa kiwa sikai, u Montri da ong u wa ka sorkar da dep kheiñ ko waroh chwa u chim ya ka rai wei da pynrap u deiwa ong wa ka T. 1.45 klur ympu ye u su ya ka tulop yong waroh.
U Prestone da ong u wa ya ka tulop kiwa sikai, ka sorkar su ko neipor cheipor lait tang ka Arear wa dang sah bnai.
