I sylli ya ki kot ki sla ki kyrtong ka 2-Jowai Constituency da pyndep ya ki ynne ka 8 tarik katkam ki kyndon wa da booh da ka Election Commission of India (ECI) heiwa waroh da em 5 ngut ki kyrtong wa da mynjur yei man ki kam ki kyrtong iwa man leh i jooh ha u 2018 wa em 5 ngut hi.
Ya ini i sylli namo ka Scrutiny da leh ha Conference Hall u DC, Jowai deiwa emlang ki Returning Officer wa pait ya jar jiar ki Constituency wa em ha West Jaiñtia Hills kamjooh ki General Election Observers.
Na Jowai kiwa daw yakhun ya kani ka MLA Election 2023 toh u Wailadmiki Shylla na ka NPP, u Moonlight Pariat na ka UDP, u Awhai Andrew Shullai na ka TMC, u Daniel Dan na ka Congress wa u Allan K Suchiang na ka BJP.
Hapoh ka 2-Jowai Constituency da em 40,208 ngut kiwa thap Vote kiwa kynthup ya 18,954 ngut ki chynrang wa 21,254 ngut ki kynthai.
Kam wow pynkynmoo wa ha u 2018, u Wailadmiki da jop u deiwa yoh 10,657 Vote wei hei wa ar da wan u Moonlight Pariat uwa da yoh 9,354 Vote.
Ka sngi thap Vote ha uni u snem toh ha ka 27 tarik uni u bnai katwa ka sngi niaw Vote won toh ha ka 2 tarik u bnai wow wan.
