Ka thaaiñ Northeast India hei sien wa nyngkong da yoh ko boon ngut dooh kiwa em hapoh ka Cabinet kam ki Montri wa ki Montri Khynnah ka sorkar pyrdi deiwa em 2 ngut kam ki Cabinet Minister wa 3 ngut kam ki Minister of State.
Ini da man ko leh i sien wa nyngkong wa kawa mihkhmat na Tripura da yoh ko man Montri wei ha sorkar pyrdi kattæ da em ki Montri na ki 4 tylli ki jylla ka thaaiñ Northeast heiwa ka Assam da yoh ko arngut wa mar uwi na Arunachal Pradesh, Manipur wa Tripura.
Ya ini da pynbna ynnin kam chibynta i pynheh wei kylliang chuki ya ki Montri hapoh ka sorkar u Modi.
U Montri Rangbah warim ka Assam u Sarbananda Sonowal da man biang u kam u Cabinet Minister heiwa chwa ini da dep chah jied u cha ka Lok Sabha la arsien wei da dep u wow man kam u Sports & Skill Development Minister hapoh ka sorkar wa nyngkong u Modi ha u 2014 hadooh 2016 chwa wow man u kam u Montri Rangbah ka Assam.
Sa uwi na Assam toh Rameswar Teli uwa pteiñ wow man kam u Montri Khynnah.
U Kiren Rijiju leh da yoh u wow man kam u Montri nei man Montri Khynnah uwa jooh pait ya ka Sports & Youth Affairs heiwa u man noh u kam u Minister of Law and Justice.
Ar ngut kiwa dang thymme na Northeast wa dang man MP hei sien nyngkong kitæ na Inner Manipur u Dr. RK. Ranjan Singh wa ka Pratima Bhoumik na West Tripura, da yoh wow man kam ki Minister of State.
Ki Montri wa ki chnat wa ksoh ki man ki kamni ha wah:
- Kiren Rijiju-Minister of Law and Justice.
- Sarbananda Sonowal-Minister of Ports, Shipping and Waterways; wa Minister of AYUSH
- Rajkumar Ranjan Singh- Minister of State hapoh ka Ministry of External Affairs; wa Minister of State hapoh ka Ministry of Education.
- Rameswar Teli-Minister of State hapoh ka Ministry of Petroleum and Natural Gas; wa Minister of State hapoh ka Ministry of Labour and Employment.
- Sushri Pratima Bhoumik- Minister of State hapoh ka Ministry of Social Justice and Empowerment.
