Ki kyrtong ka 3-Raliang Constituency wa em 6 ngut wa kynthup ya u Comingone Ymbon na ka NPP, u Shemhok Garod na ka PDF, u Lakhon Biam na ka BJP, u J. Treilang Suchiang na ka UDP, u Richard Lyngdoh na ka Congress wa u Robinus Syngkon na ka AITC ynne da wan ki wow pyndep ya ka Scrutiny namo wow sylli ya ki kot ki sla wa da e ki heipor wa thap pyrtuid yow yaleh ya kani ka Election MLA 2023.
Ya ki kot ki sla da sylli hapoh ka Conference Hall u DC, Jowai deiwa em ki Returning Office yong jar jiar ki Constituency kamjooh ki General Observer ka Election.
Ha kani ka Scrutiny da chem wa waroh ki kot ki sla ki kyrtong toh kiwa da biang wei da biang wow lai ki chakhmat.
Kiwa yakhun pyrchah wa u Comingone ha kani ka kynti toh kiwa da dep jop MDC lut wei lait na u Shemhok Garod toh kiwa dang man MDC katni heiwa u Robinus Syngkon da man u leh kam u MLA warim ka Mowkaiaw uwa da rem noh ha u 2018.
Ha u 2018 u Comingone da jop u deiwa yoh 12,129 Vote wei da yoh wa ar u Lakhon Biam uwa da yoh 8,879 Vote wei hei wa le da yoh u Richard Lyngdoh.
Kiwa thap Vote ka 3-Raliang (ST) waroh da em ki 38,804 ngut heiwa 18,490 ngut toh ki chynrang wa 20,314 ngut ki kynthai.
