Ka Special Court ka National Investigation Agency (NIA) wa em ha New Delhi da phah kset ko 6 snem ya uwa chong chnong ka Thailand uwa tip kam u Naruenartwanich Wuthikorn uwa khut siñ kam u Willy deilang ka kuna wa Rs. 5 lak yei emkti u wow pynyoh tiar yasiat ya ka NSCN (IM).
Ya u Willy da ye wow sai oo na Thailand wei da wanrah oo cha India heiwa da rai pynrem ya oo ha ka 24 tarik u September hapoh ka Sections 120B wa 122 ka Indian Penal Code wa Section 18 ka Unlawful Activities (Prevention) Act kiwa man ki kyndon wow yaleh pyrchah ya ka India.
Ka NIA da Register ko ya ka Case ha ka 13 tarik u January u snem 2010 hadien wa pynmih hukum ka Ministry of Home Affairs wei hei takit da chemdien ya u Willy uwa na Bangkok uwa man kam u dalal wei uwa ya tipmit wa kiwa chna suloi kiwa na China yow dai cha ka NSCN (IM).
Kini ki tiar yasait kynthup ki hadooh 1000 tylli ki suloi, 5 lak tylli ki kuli wa kiwi ki de hadooh ki Rocket Launcher kiwa chongdor hadooh $1.2 Million.
U Willy da yaklam u wa u Anthony Shimray uwa man kam uwa pynyoh tiar yasiat ya ki NSCN (IM) wei da pyntipmit u wa kiwa na China kiwa khayi wei chna tiar yaisat.
Tangwa kini ki tiar yasiat ym em poi ki cha India heiwa da mut wow wanrah ki lyngba ka Cox’ Bazar ha Bangladesh wei heitu i ka sorkar ka Sheikh Hasina da sdang ko wow kynreh ya kini ki kaam wa leh ki seiñ kieñsuloi ka thaaiñ Northeast hadooh wym ye de ki wow wanrah ya kini ki suloi.
Em leh ka khubor wa da ong wa ka NSCN (IM) da su ko hadooh $700,000 hadooh $800,000 cha ki bru kiwa na China yow thied ya kini ki tiar yasiat.
Ya u Anthony leh da yoh wow kem ha u snem 2010 na Nepal heiwa da wanrah ya oo cha India.
Ka yung bichaar kawa na Thailand ha u April 2014 da e bor ko wow sai ya u Willy yow lai rah oo cha India hadien wa da chem wa biang ki sabut wa emkti u ha ini i kaam.
Discussion about this post