64 tylli ki Medical Seat yoh ka Meghalaya ha USTM na ki 150 tylli

Ka Montri ka chnat i chait i ka khiah ka jylla, ka Ampareen Lyngdoh da pyntip wa ko wa ki khynroo khyllood kiwa da yoh u lai puræ Doctor (MBBS) na ka bhah namo ka Quota ka sorkar hap ki wow su iwa khian tangwa kani ye wow yoh won ka kam ka Scholarship.

Tangwa i rai ka sorkar wow pynmih pynbna syndet wow pdiang yei thap Online Application wa du ar sngi ha ka 28 wa 29 tarik uni u bnai da booh ko hei eh ya kiwa yaleh. Wei katkam wa da pynbna, ya ka thup ki pyrtuid wa chah jied daw pynbna ha ka 30 tarik uni u bnai wei kitu kiwa da pyntikna hap ki wow jied noh deiwa su ha ka 31 tarik uni hi u bnai wei wow pynbiang ya waroh iwa emkaam ha ka 3 tarik u Khonchonglad (Nov), 2024.

Da ong ko wa i su toh deiwa booh ka sorkar India, kawa hap wow bood katkam ki rukom pynlai. Da ong ko wa i su phær ko na kawi ka jylla cha kawi won wei ka sorkar phah ko wow lai puræ du ha ki College yong ka sorkar.

Da khana ko wa ka USTM da tyrwa ko cha ka sorkar jylla heiyatoh wa i rukom su iwa neibynta ka jylla wei ka sorkar dang bichaar ko yeini. Ka Montri da ong ko wa da mang 64 tylli ki Seat lai puræ Doctor ya ka jylla heiwa 25 tylli u kyrchaan ka sorkar wei kiwi daw hap su hi ki tangwa deiwa rap duna dor.

Waroh ka USTM daw pdiang ko 150 ngut wow lai puræ Doctor ha ka PA Sangma International Medical College and Hospital wa kynthup ya ki Non-Resident Indians (NRI) ki wow yoh bhah 23 tylli, wa 63 tylli ki Management Quota Seat.

Ka Montri da khana ko wa hadooh kattæ da em kamwa 200 ngut kiwa da yaleh ya kini ki MBBS Seat ha kani ka College wei ini man ko iwa jop neibynta ka jylla.

Related posts

U baam smai uwi kam u Montri sorkar na Ri-Bhoi napyrdi ki 8 ngut kiwa thymme | U man Montri leh u MLA ka Jowai

September 15, 2025

Maham u SP ya kiwa pynpoor yei dur wa i Video i metyap ka Insaphira

September 15, 2025

Chooh chooh da pyntip wa i jied ya kiwa lai puræ u chong ko katkam i yoh ki ha ka NEET wei katkam ka bhah namo ka Quota.

Katkam wa man kattæ, ka sorkar dang yang ko leh yei mynjur u Lat ya ka aiñ chipor næ Ordinance hajrong wow pynkrehkaam ya kani ka College ka USTM.

Hawa kylli mynnu u sdang i puræ puthi, ka Ampareen da ong ko wa daw sdang kamwa da booh hi i por.

Kam wow pykynmoo wa kani ka Medical College da yoh ko yei mynjur na ka National Medical Commission (NMC).