U Montri wa pait ya ka chnat bordiñ ha ka jylla, u James PK Sangma da pyntip u wa i kreh ha ka Ganol Small Hydro Project hadooh katni 66.60% toh iwa da dep wei da booh thong wow pyndep ha u Naisan 2022.
Hawa jubab yeiwa kylli u MLA ka Congress, u Zenith M Sangma hapoh ka yung dorbar ynne ka sngi, u James da ong u leh wa i lut neibynta kani ka Project wa da dep pynthymme biang ha u snem wa dadep da man ko T. 507.71 klur.
Da pyntip u leh wa i daw wa hap wow pynthymme yei lut toh wa da emkaam chooh ya ki tiar katkam i pynwandur da ka Central Water Commission, heiwa hap thied leh ya ki tiar wa thymme wei nei ku dor ki tiar katkam i por.
Da ong u wa ya ka DPR wa ka Tender neibynta kani ka Project da leh ha u snem 2007.
