Shillong: U Commissioner & Secretary ka Health and Family Welfare ka sorkar jylla, u Sampath Kumar (IAS), da pyntip u wa nadooh ka 24 tarik u Thohlakhmi (Feb) hadooh katni da me 7,700 ngut ki bru wa ka chnat da phah ko wow chong ha ki jar jiar ki yung wei wow yait nei yajan wa kiwi (Self Quarantine) neibhah wa kini toh kiwa wan na kiwi ki thaw wa chah ktah ha u khñiang COVID-19.
Hawa klam wa ki laad pathai khubor, u Kumar da ong u wa na kini kiwa da liwan cha ka jylla hadien wa poor u khñiang COVID-19, 163 ngut toh kiwa wan na kiwi ki ri, katwa kiwi won toh kiwa wan na kiwi ki jylla ka ri India. Da ong u wa neiliang ka chnat da paitbniah bha ko ya kini ki bru yow pyntikna wa i chait i khiah deiwa Phone arsien chi sngi.
Da pyntip u leh wa hadooh katni ka chnat da dep ko wow Test ya 66 ngut ki bru kiwa sñiaw chitom wei da chem wa ym toh kiwa chah ktah ha u COVID-19.
Uni u sahep da pyntip u leh wa ka chnat da pynkhlan chooh chooh ko yaki thaw sumaar deiwa booh leh ya ki COVID-19 Care Centre, i pynbiang ya ki dawai wei da pynbiang leh ya ki Ventilator kiwa em katni 64 tylli.
Da pyntip u leh wa ka chnat da pynkhreh ko hadooh 70 tylli ki Hospital wow sumaar lada em i suba wa em kiwa chah ktah na uni u khñiang kjut, kini ki Hospital kynthup ki ya ki Hospital sorkar, nadooh ki CHC wa PHC wei kamjooh leh ki Hospital wa pynlai da ki bru samen wa ki kynhun niam.
Ha i jooh i por u Kumar da pyntip u leh wa ka sorkar jylla da kyntu ko yaka sorkar pyrdi wow booh sa kawi ka Testing Centre ha Tura, neibhah wa kamwa man katni, da em du kawi ka Testing Centre ha kani ka jylla, katæ ha NEIGRIHMS ka wow chem chitom wow leh ya ki Test kiwa wan na Garo Hills neibhah wa jngai.
Discussion about this post