U SP ka South West Khasi Hills da pyntip u wa ynne ka sngi da pynman ya ka Dorbar ka Hima Langrin heiwa da sdang ko deiwa jai-jai heipor kamwa 11:30 i step ha pchem ka Office ka Hima Langrin ha chnong Phlangdiloiñ heiwa da em kamwa 1500 ngut ki bru kiwa boon toh kiwa kyrchaan ya u Syiem.
Heipor wa dang pynman ya kani ka yalang, da wan sa kamwa 1500 ngut kiwi kiwa pyrchah ya u Syiem deiwa ong ki wa kwah ki wow embynta ha ka dorbar.
Kamtæ katwa dang lai ka yalang, kini kiwa pyrchah da pyrchang ki wow pynthut tangwa deiwa em ki pulit deilang ki Magistrate da ye wow pyn jai-jai wei da pteiñ biang ka dorbar.
Chwa u kut won ka dorbar heipor kamwa 12:15 i pyrdi sngi, da em ki kattu katni kiwa em na ka liang pyrchah kiwa da sdang wow pynkulmar heiwa da tympiah tyngkheiñ ki ya ki chuki wa kiwi de kiwa da pynyieñ ha kani ka thaw pynman dorbar wei manda pyrchang ki Magistrate wa ki pulit wow pynsangeh ki, kini ki bru da toor ki cha ka Stage wei da em leh kiwa kawang moo ya ki pulit.
Kamtæ ki pulit da pynemkaam ki dei bor wa khian yow lait u heh i kulmar tangwa kini ki bru da pteiñ ki wow pynjoor yei kynaad tangwa ki pulit da ye ki wow khanglaad ya kini ki bru kiwa da wan toor wei hadien da mih noh ki napoh ka dara wa pynman ya ka dorbar.
U SP da pyntip u wa ha ini wa jia, da em 7 ngut ki pulit kiwa da mynsoo heiwa uwi na ki rap joor i mynsoo u heiwa da pynyoh yei sumaar.
Kamwa man kattæ da man iwa jai-jai wei ki pulit leh u neh ki ha kani ka thaaiñ yow pait bniah yow lait u em biang iwon iwon i kulmar.
Da pyntip leh wa dang yang ya ka FIR na u Syiem ka Hima Langrin.
Discussion about this post