Ka Lok Sabha ha ka 6 tarik uni u bnai da wanrah ko yei pynkylla ya ka Taxation and Other Laws (Amendment) Bill, 2026 i wow pynkylla ya ka Payment and Settlement Systems Act, 2007 wow e bor ya ka sorkar pyrdi wow chah ya ki Bank wow ah/khate poisa (Levy Charge) heiyatoh wa i phah poisa lyngba ka Unified Payments Interface (UPI) wa kiwi ki rukom phah poisa (Electronic Payment).
Ya kani ka Bill wa pdiang da ka Voice Vote khlem iwon iwon i phyllu yumut tangwa em i kbai pyrchah na ki MP ka Liang Pyrchah kiwa kbai ya ki kyntien wa chah tooh ka poisa wa da e sñiawbha cha ka Ram Mandir ha Ayodhya.
Ini i pynkylla da pyndam i wow khang ya ki Bank wa kiwi wow chim ya ka Merchant Discount Rate (MDR) na i rukom phah poisa Online.
Katkam wa man katni du ka RTGS wa NEFT wa ah ya ka poisa Service Charges, katwa i phah poisa da ka UPI da lait i na ka MDR nadooh wa sdang ha u snem 2020.
Hadien wa chong biang ka dorbar heipor 2:00 wajei hadien wa pynsangeh (Adjournment), ka Finance Minister, ka Nirmala Sitharaman da wanrah ko ya ka Taxation and Other Laws (Amendment) Bill, 2026, wow pynjylla ya ka Payment and Settlement Systems Act, 2007, ka Income Tax Act 2025 wa ka Finance Act, 2026.
Katkam i tyrwa ka sorkar, ka rukom ah poisa toh iwa da mang wow yoh nong ki Bank, ki Payment Service Providers (PSPs) wa kiwi deiwa pyrkhat leh ya kiwa khayi khian.
Hapoh ini i thmu ka rukom phah poisa nawi hawi Person-to-Person (P2P) UPI transaction u neh ki ha baar ka MDR. Tangwa ki Bank wa ki Fintech Company ye ki wow chim ya ka MDR wa nadooh 0.25% hadooh 0.4% ha ki kaam khayi wa palat Rs 2,000 wei ye leh u kheiñ deiwi.
Ki sahep sorkar da ong ki wa i pynkylla ya ka MDR u man iwa duna yeiwa ah hawa pynemkaam da ka Credit næ Debit Card.
Ini mut i wa i phah poisa na uwi u bru cha uwi ym chah khate poisa, kamjooh hawa su ha ki dukan iwa hapoh Rs. 2000 tangwa manda tam Rs. 2000 daw hap u su ka bai khate da ki tre dukan wei ini lada toh ka dukan kawa khayi da ki klur tangka.
Discussion about this post