U Montri wa pait ya ki Kaam Pohyung ka jylla, u Lahkmen Rymbui da pyntip u hapoh ka yung dorbar chna aiñ ka jylla ynne ka sngi wa ha ki 5 snem wa da lai da em 7 tylli ki pdung Bomb IED wada jia hapoh Meghalaya.
Kini toh iwa da jai ha Laitumkhrah, Shillong ha ka 10-08-21, ha Khyndailad iwa da jia ha ka 30-01-22, ha Dawki ha 01-02-18, ha Krishna Colony Lane iwa da jia ha ka 12-12-20 wa takit da ki pulit ka Lumshnong, EJH, iwa jia ha yaw Sookilo, EJH haka 26-11-20 iwa da takit da ki pulit ka Khliehriat, iwa jia ha Police Reserve Khliehriat haka 14-07-21 wa iwa jia ha chnong Sawilgre, East Garo Hills ha ka 10-02-18 iwa da takit da ki pulit ka Williamnagar.
Neiliang u MLA ka West Shillong, u Mohendro Rapsang da kylli u wa hadooh katwon ngut kiwa chah kem wei lada em kiwa dang hapoh 18 snem wa chah kem hajrong ini i kaam, neiliang u Montri da ong u wa ym ye u wow khana ya ini waroh neidaw wa da em ka Judicial Commission of Inquiry.
U Montri da khana u leh wa neiliang ka sorkar da yaleh ko wow pynbha pynmiat yei rukom pynlang yutip ki pulit, u pynkhlan yei pait ya ki Cyber Crime yow wanrah yei suk i saaiñ deiwa pyntip u leh wa ka sorkar pyrdi da mynjur ko ya i yaklam yasuk waka HNLC wei ini waroh da lai lang ki kaam chakhmat chirup yow wanrah yei chongsuk chongsaaiñ.
Heiyatoh wa iwa jia ha Sawilgre, neiliang ki MLA ka Garo Hills da kylli ki iyi wa jia ha ini neibhah ym em wa wan chakhmat yow kam wa emkti ya ini i kaam haddooh wa da khlaad leh uwi u kyrtong MLA ha itai iwa jia heiwa da dawa ki leh wow thung da ka takit wa leh da ka NIA, CBI wa kiwi kiwi.
