Ka DC ka East Khasi Hills da pyntip ko wa da em 7 tylli ki thaw wa oor khyndaw ynne ka 4 tarik hapoh ka District wei da dooh leh ya ar tylli ki mynsien bru wei da ktah ko leh ya ki yung ki sem wa ki luti syngkieñ.
Da em i oor khyndaw ha rood ka Wahumkhrah hajan ka Lawmali Quarter heiwa chibynta u sarok da oor noh i cha rood ka wah wei da wan kær ya ini i bynta wei da phah leh ya ka chnat MeECL, PWD wa ka SMB yow pynchna ya iwa sih.
Ha u sarok Mawphlang-Balat wa em hapoh ka Mawsynram Block da oor khyndaw ha i bynta wa 33 Km uni u sarok wei i kreh wow pynkhooid ya ini da lai i chakhmat wei da ye ki u kari u lai biang kattæ.
Ha u sarok Shillong-Dawki (NH-40), u sarok da sahkut u ha i thaw wa em chakhmat i chnong Saitbakon heiwa kawi ka kari da sahkut ko ha ini i bynta tangwa ym em wa mynsoo. Ki khynnah skur kiwa yaleh ya ki Board Exam da yarap ya ki da ki pulit yow poi ki cha i thaw thoh Exam ki. Ya ini i khyndaw da pynkhooid waroh chi sngi wei hadooh 5:00 waje i janmiet da ye wow pynkhooid ya ini. Da phah leh ya ki bru ka PWD wa NHIDCL wow man ki kiwa pynkhreh lada joor biang u slap.
Hapoh ka Mawkynrew C&RD Block da em i oor khyndaw ha soo tylli ki chnong heiwa ha chnong Mawlat ar ngut da dooh ki yei mynsien yong ki hadien wa oor khyndaw heipor wa lai luti ki. Kiwa khlaad toh u Rohis Kshiar (14 snem) uwa naka chnong Mawlat wa u Dilibon Tangsang (35 snem) uwa na chnong Mawkria.
Da phah ya ka yung krehkaam u BDO, PWD, DM&HO wow lai pait ki yeini.
Ha chnong Umblai hapoh kani ka Block hi, da em ar tylli ki yung wa ar tylli ki dukan kiwa da chah ban hei oor khyndaw. I yung yong u Kro Kshiar toh iwa da pra lut katwa i yong u Pharanki Khongjoh da chah ktah i malu mala. Ki dukan toh yong u Sngur Khonjoh waka Kshnonti Mary Khongjoh kiwa da chah ktah ha ini i oor khyndaw.
Ha chnong Thangbnai-Mawlyngot hapoh ka Mawkynrew Block hi, da em i oor khyndaw heiwa kawi ka kari da chah rah ko tangwa ym em bru wa yap wei da phah ya ka chnat PWD wow khooid ya uni u sarok iwa dang lai chakhmat.
Ha chnong Lyngshing haka jooh biang ka Block, da em 4 tylli ki yung kiwa da chah ktah nei oor khyndaw ki yong ka Jamin Surong, ka Judia Nongrum, ka Kastina Nongrum, ka Kyrkhu Longshiang wa u Hame Bina uwa da mynsoo leh malu mala hadien wa chah ban i yung ha i khyndaw.
Neiliang ka sorkar da phah ko ya ki mar-baam, ki kymmor wa kiwi kiwi lyngba u BDO cha ki manyung wa chah ktah.
