U Montri Rangbah ka jylla, u Conrad Sangma da pynbna u wa ka sorkar jylla daw sdang ko ya ka Police Infrastructure Renovation Fund (PIRF).
Da pyntip u wa lyngba ka PIRF, ka sorkar daw e yarap poisa ko cha ki District lyngba ka District Rural Development Agency (DRDA) kiwa daw krehlang wa ki SP kamjooh ki Battalion yow chna pynmiat ya ki Police Station.
Da khana u leh wa daw pynlait poisa cha ki District ki wym em ya ka SP Office wei daw e leh 76 tylli ki kari thymme cha ki pulit deilang wa ki Computer wa waroh iwa emkaam wow pynkrehkaam ya ka IT.
Daw e lai ya ki truck khwe wa ki Ambulance cha ki thaw wa joor i khynnia kari ha ki District wa ki thaw wa rap joor i ya tyrrah kari yow pynbha yei chakri ki pulit ya ki paidbah.
Chooh chooh daw e 60 tylli ki thuk-thuk yow suk u lai sonteri ki pulit kamjooh yow pynbait yei sahkut kari.
Yeini da leh deiwa pyrkhat wa na ki 4 lak tam ki kari wa em ha Meghalaya, 50% em ki ha East Khasi Hills.
U Conrad da khana u leh wa 70% ki pulit ym biang thaw sah ki wei da hap ki wow sah yung wai, neiliang ka sorkar daw yarap ko wow wanrah da ka Housing Project yow pynbiang thaw sah ya ki pulit ha ki District.
Da pynbna u leh yow sdang ya ka Chief Minister Police Medal Award waka Chief Minister Disaster Response Medal yow pynkupburom ya ki pulit kiwa chakri ya ki paidbah wei daw sdang wow jied ya ki pulit nadooh uni u snem yow e mynsien leh ya ki.
Heiyatoh wa ki kreh pulit wa dang lait ki wym pu em thung, u Conrad da ong u wa da chimkhia yow pyndep smat yeini.
