Shillong: Ka chnat puræ puthi ha ka jylla, ynnne ka sngi da pynbna ko wa ya ki Exam wa dang sah yong ki khynnah Class XII u sdang biang wow pynman ha ka 8, 9 wa 10 tarik u Naiynru (June) wow wan, wei yaka Routine ka MBOSE daw pynbna noh mynstep ka sngi, katwa ya ki Result yong ki Exam wa da pynman da ka Meghalaya Board of School Education (MBOSE) daw pynbna noh la kammon kammon haka tayaw wa nyngkong u Naiynniaw (July).
Hawa yaklam wa u Montri wa pait yaka puræ puthi ha ka jylla, u Lahkmen Rymbui da pyntip u wa ki Exam wa dang sah toh ha ki soo tylli ki Subject wa kynthup ya ka Mathematics, ka Physical Education, ka Statistic wa kawi ka Western Music.
Da pyntip u wa ha ka Mathematic em 3772 ngut ha ki 59 tylli ki Center, Physical Education 49 ngut ha kawi ka Center, Western Music 28 ngut ha ki ar tylli ki Center wa ka Statistic wa em 8 ngut du ha kawi ka Center.
Hawa kylli heiyatoh wa ki Result, u Rymbui da pyntip u wa i pynbait ya ki Paper yong ka SSLC da sdang nadooh ka 22 u Naitung (April), tangwa da ong u wa neidaw wa i por ym em man i kamwa jooh, daw chimpor wow pynmih ya ka Result wei pynsñiaw u yei kyrmen wa ye u pyndep katwa ye, kamjooh i pynbait ya ki Paper yong ki HSSLC leh da lai ko katni chakhmat wei yooluti u wa daw ye u pynbna noh ya ki Result ha ka tayaw wa khaddooh u June ne ka tayaw wa nyngkong u July.
Discussion about this post