Ka Election chiteiñ samoi ha ki 3 tylli ki Constituency, kitæ ha Mawryngkneng, Mawphlang wa Rajabala da kut noh ko ynne i janmiet 30 tarik. Ha kani ka Election chiteiñ samoi i poi kiwa lai thap Vote hadooh i por 5 waje i janmiet da man ko 80.43% ha waroh le tylli ki Constituency.
Katkam wa pyntip u Chief Electoral Officer (CEO), u Federick R Kharkongor wa naka 80.43% wa da yoh yukheiñ da yooluti wa daw ku chooh chooh neibhah kamwa 20 tylli ki Polling Station ym pu em u yoh yukheiñ.
Da pyntip wa hadooh i por 5 waje i janmiet da poi i thap Vote ha Mawryngkneng 74.69%, Mawphlang 75.97% wa ha Rajabala 90.63%. Da pyntip u wa ha kani ka Election kiwa da mih wow lai thap Vote kynthup ki nadooh ki bru tymmen wa kiwa dang yoh wot wow thap Vote ha ka sien wa nyngkong, heiwa da pynbiang leh ya ki laad yada kam da ki Disposable Gloves wa ki Hand Sanitizer.
U CEO da pyntip u leh wa ha kani ka Election da em 6 tylli ki kor VVPAT kiwa thut heiwa da ye wow kylliang noh, da pyntip u leh wa ki VVPAT kiwa da hap wow kylliang toh 2 tylli ha Mawphlang, kawi ha Mawryngkneng wa 3 tylli ha Rajabala.
U Kharkongor da ong u leh wa ka chnat Election da pynbiang ko ya ki bor sonteri ya ki thaw wa booh ya ki kor thap Vote kiwa daw niaw ha ka 2 tarik Khonchonglad. U CEO da pyntip u leh wa em 168 tylli ki Polling Station wa 1,02,695 ngut kiwa thap Vote ha waroh 3 tylli ki Constituency.
Kam wow pynkynmoo wa ki kyrtong wa yakhun ya ka Election chiteiñ samoi ha ki 3 tylli ki Constituency da em ki waroh 13 ngut, wa kynthup mar 5 ngut na Mawryngkneng wa Rajabala wa 3 ngut ki kyrtong na Mawphlang.