U Symbood Montri Rangbah ka jylla u Prestone Tynsong da ong u wa hadooh kamwa 80 na ka 100 kiwa chong wa sah ha ki chnong khappood ka Meghalaya wa Assam toh kiwa em wei kiwa ksoh ar tylli ki EPIC, kawi yong ka Meghalaya wa kawi yong ka Assam.
Ya ini u Prestone da pynsñiaw u hawa kylli iyi em u wow ong hajrong i lai chakhmat yong ka sorkar India wow ‘Link’ næ pynyabi ya u Aadhaar wa ka EPIC, heiwa da ong wa i thmu hi katkam i sñiaw yong oo samen, yoosar wa ka sorkar India ka kwah ko wow pyndooh wei pyntikna wa uwi pa uwi uwa chong chnong ka ri u em bait u du kawi ka EPIC.
Ya kani ka aiñ Election wa thymme wa tip kam ka Election Laws (Amendment 2021), da mynjur da ka Lok Sabha wa Rajya Sabha. Kani ka aiñ da chah ko wow pynyabi ya u Aadhaar Number wa i pyrtuid kiwa thap Vote lane ka Voter ID yong ki tre chnong ka ri India.
“Ha nga samen nga sñiaw O wa khamtam wa yoo hawa yaklam khappood chi khappood, nga da tip wa lada phi ngait næ ym em, da em ym duna ya ka 80% kiwa chong wa sah ha ki thaaiñ khappood ka Meghalaya wa Assam kiwa em ar tylli ki EPIC, kiwa da lai cha Assam wa Meghalaya ha i por thap Vote wow yoh myntoi na waroh ar liang,” da ong u Prestone hawa klam wa ki laad pathai khubor.
“Ha i sñiaw yong nga, ini man ko kawa bakla wei ka wym toh neibhah ki kyndon yong ka Election Commission da dep wow klam che wa uwi u bru kawi ka EPIC,” da ong u.
Chooh chooh u Prestone da ong u, “I wanrah yong ka sorkar bei ya kani ka aiñ hei sñiaw yong nga samen tharai wa em i thmu wow pyndooh wei pynthikna wa waroh kiwa chong chnong hapoh ka ri toh u em bait ki du kawi ka EPIC.”
