U Montri Rangbah ka jylla, u Conrad K. Sangma ynne ka sngi da pyntip u wa kiwa kwah u lai puræ cha ki UG Course wa em ha waroh ki Private Colleges lane ki College wa kyrchaan poisa da ka sorkar ym emkaam u yaleh ki ya ka CUET Exam.
“Ini i pynlait naka CUET toh kawa daw pteiñ wei ym em booh por. Ki College ki wym embynta heiyatoh wa i yaleh Admission ha NEHU ym emkaam ki wow yaleh ya kani ka Exam wot ha ki snem wow wan,” da ong u Conrad.
Da khana u wa da dep u wow pyntip cha u Union Education Minister, u Dharmendra Pradhan ynnin wa ka CUET Exam toh kawa da phah leh du ya waroh ki College kiwa da tipmit da ka Central University.
Da ong u wa u Montri ka sorkar pyrdi leh mynjur u wa ileh ki khynnah wa thooh thaw puræ ha ki UG Course ha ki Private Colleges lane ki College ka sorkar jylla wow hap ki wow chong yaleh ya ka CUET.
U Conrad da e nongmuna u deiwa ong wa ki khynnah wa lai puræ ha ki College wa em 200 Km naka NEHU ym yaleh ki wow lai puræ ha NEHU.
Da ong u leh wa kini ki khynnah daw kwah ki wow neh ha jar jiar ki thaw namo ki District wa em ki.
“Kamtæ iyi i daw wa hap kini ki khynnah wow yaleh ya kani ka Central Exam? Ini mut wa 90% ki College ha ka jylla ym emkaam ki wow yaleh ya ka Common Entrance Examination,” da ong u Conrad.
Da pynche u leh wa kitu ki khynnah kiwa kwah u lai puræ UG Course kiwa da pynkhreh da ka NEHU daw hap hi ki wow yaleh ya ka Common Entrance Test.
Chooh chooh da pynche u wa kitu kiwa kwah wow lai puræ ha ki Central University lane ki College ha ki Campus ka NEHU ha Shillong wa Tura kam ka Law College lane ka Agriculture College daw hap ki wow yaleh ya ka CUET Exam.
