Shillong: U montri rangbah ka jylla u Conrad Sangma heipor wa pynbna u yaka Lockdown hapoh sor Shillong ka wo man haka 13 wa 14 tarik uni u bnai, da pyntip u wa da leh ya ini neidaw wa palat 95% kiwa dang em ya u COVID-19 hapoh ka jylla em ki ha Shillong.
Ha Meghalaya da ku syndet kiwa yoh COVID-19 ha kini ki sngi heiwa haka 24 tarik u June da em du 4 ngut kiwa dang em ya uni u khñiang katwa hadooh ynne i janmiet da em 236 ngut.
Na kini ki 236 ngut, kiwa boon toh ki Border Security Forces (BSF) kiwa em 159 ngut wa 2 ngut ki Air Force katwa kiwa sah toh ki bru paidbah 44 ngut iwa man 205 ngut du ha East Khasi Hills.
Ki bru paidbah toh kiwa yabi na kitu kiwa yachem wa ki 2 ngut iwa da poor naka khawai ha Khanapara wei da em leh ki wakreh ka North Eastern Indira Gandhi Regional Institute of Health and Medical Sciences (NEIGRIHMS) kiwa da yoh.
U Conrad da pyntip u wa kini waroh 236 ngut toh kiwa khlan kiwa ym em ki dak ki chin wa chitom (Asymptotic).
Da pyntip u leh wa yaka Lockdown wa daw pynkrehkaam haka Monday wa Tuesday toh neidaw du ha Shillong wa ki thaw wa em marjan wa da em 205 ngut kiwa dang em ya u COVID kiwa na East Khasi Hills donhi.
Kiwa dang sah kiwa em COVID-19 toh 20 ngut ha Ri-Bhoi District, 9 ha West Garo Hills wa 2 ngut ha East Jaiñtia Hills.
Yaka Lockdown da leh kam chibynta wow wanrah yei kylla hei rukom im rukom myllien ki paidbah yow yada ki pyn da idæ wei u pteiñ ko hadooh 6 waje i step ka Wednesday.
Heiyatoh won wa kiwa liwan chapoh ka jylla, u Conrad da ong u wa ym khang yei liwan ki wei hadooh ynne i sngi da em 21,496 ngut kiwa da liwan. Tangwa dang khang hi ya kiwi na kiwi ki bynta ka ri wow psiah chapoh ka jylla.
