Jowai: Hadien wa mih Wyrta wa ong wa pynemkaam bakla ka Executive Committee ka JHADC ya ka poisa wa T. 5.74 klur kamwa da pynbaad da ka seiñ JSU, neiliang u Executive Member, u Winning G Sungoh uwa pait ya ka chnat Taxation Dept da pynche u hajrong ini i chah pynbaad.
U Winning da ong u wa ym em yurim ini i pynbaad neibhah wa ki Check Gate wow kynreh kot ya ki kari ki baar jylla da e wai (Lease) cha uwi u bru wa tip kam u Eddy Stone Shylla le snem nadooh ka 25 Naitung (April) 2018 ryngkat wa ki kyndon wa da soi wow chim T. 200 kawi ka kari, wow pait ya ki kot ki sla yong ki wei da soi leh ka soskular wow su cha ka JHADC kamwa T. 32,00,000 chi snem.
Da pyntip u leh wa khnang wow pynlai bait ya i yakut, neiliang ka Council da booh ko ya ki Inspector wow pait wei wow pyntikna wa lai bait kani ka kaam.
U Winning da ong u wa neitæ i daw i pynbaad wa baam-tooh ka Executive Committee ya ka poisa man i hei mutdur donhi wei iwa bakla chiboon neibhah wa u leasee (Shylla) su u ya ka poisa ha ka Receipt Cell ka Council wei ym em wa ye u sai ya ka deiyi deiyi leh.
Da kyntu u leh ya ki paidbah wymtoh u sñiawthooh bakla ki ya kam kini ki khubor hamsaya kiwa ympu pynsakhiat ya ki.
