Ym toh wow leh Politics yei e pyrtuid ya u sarok, ym ye de wow pynykylla: Sanbor Shullai

Shillong: U MLA ka South Shillong, u Sanbor Shullai da pynche u wa i rai wow e naam yaka Zig Zag Road cha ka Ardendhu Choudhuri Road toh kawa da chim nadooh u snem 2018 haka yalang wa da khut daka Greater Laban Committee Development Society deilang waki dorbar chnong wa ki seiñgbhalang, wei da yoh leh yei mynjur na kiwa hayung hasem, deiwa pynrap wa kattæ ym ye de wow pynkylla ya itai i pyrtuid wa da mynjur leh da ka sorkar.

U Sanbor da pynbaad u leh wa i thmu wow pyrchah toh i buit leh Politics yong ki kattu katni, heiwa da ong che leh, lada kwah wow yaleh Election toh u lai cha ki paidbah, tangwa ham leh Politics khlem da tip yei yong sakhiat.

Da ong u wa ha u snem wa da dep leh da pyrchah ki ya ini i thmu heiwa neiliang ka dorbar chnong Kenches Trace da phah ki ya ini i thoh cha ka KSU heithaw wow thoh bait cha u MLA lada kwah ki wow yoh yei pynche.

Da pyntip u leh wa neiliang ka KSU wa kiwa yahkhmat chnong da lai e chithi ki cha u MLA wym e naam yaka Zig Zag Road cha u wym toh u Khasi, deiwa pyntip leh wa kam u MLA da pynche u ya i e naam ha u Ardendhu Choudhuri. U Sanbor da pyntip u wa da pynche yaki ya iwa da e sñiawbha yong u Ardendhu Chaudhuri kam u MLA wei kamjooh u pa yong oo, u Prashunath Chaudhury uwa man leh u MLA haka thaaiñ nadooh i por ka Assam wa ki toh kiwa chong chnong wa pura yong ka Laban.

Related posts

Pynkhreh ka BJP Meghalaya ya ka Election 2028 deiwa pynskem ya kiwa kitkaam thymme

June 14, 2025

Kyntait ka Agatha Sangma wow man ka kyrtong MP cha Rajya Sabha

May 29, 2025

Chooh chooh da pyntip u leh wa u Ardendhu Choudhuri toh u Director warim ka Printing & Stationery ka sorkar jylla, wei hadien wa man u kam u MLA da man u uwa nyngkong na ki MLA ki wym toh ki Khasi wow wanrah ya i phang hapoh ka yung dorbar wow pynpsiah ya i ktien Khasi ha 8^th Schedule.

Da pyntip u leh wa u Ardendhu toh uwa e sñiawbha khlem pait chiliang wow yarap bha ya ki Khasi, wei ka kurim u leh toh ka Khasi wa tip kam ka Grey Varnette Lyngdoh Marbaniang kawa man leh ka President yong ka Seng Kynthei Kenches Trace, Oxford/Rilbong.

Hawa yatoh wa i e naam ha i pyrtuid u Hoping Stone Lyngdoh, da ong u wa kini ki bru ha u snem 2019 da dawa ki wow e naam noh ha u Dapstralin Lyngdoh uwa toh u rangbah shnong warim, tangwa katni da dawa ki wow e ha i pyrtuid u HS Lyngdoh Mawlong.

Da ong chooh chooh u wa neibynta u HS Lyngdoh, ka chnong wa da kha wa heh wa san u ha Mawkyllei, ka dorbar chnong da chna ko da u mot sahnaam neibynta uni u rangbah uwa da leh chiboon neibynta ka jylla.