Shillong: U Lamphang yong ka yung dorbar Meghalaya Legislative Assembly, u Metbah Lyngdoh da lum u ya ka yalang kawa le yong ki MLA ka jylla wa kynthup na ka sorkar wei kamjooh ki MLA kiwa em ha i liang pyrchah. Ha kani ka yalang da yatai sani bha ya i krehkaam yong ka sorkar wow yada na i poor yong ka khlam COVID-19 hapoh ka jylla.
Ha kani ka yalang da emlang leh u Montri Rangbah, u Conrad K Sangma, u Symbood Montri Rangbah, u Prestone Tynsong, wa kiwi ki Montri sorkar wa kynthup ya u Lahkmen Rymbui, u James K Sangma, u AL Hek, katwa neiliang ka liang pyrchah da emlang u Himalaya M Shangpliang, ka Ampareen Lyndoh, u Meralborn Syiem wa u Zennith Sangma kamjooh ki sahep sorkar.
U Metbah Lyngdoh da yaroh u yaka sorkar kawa da yakhun wow khanglaad yei poor u khñiang COVID-19 hapoh ka jylla, deiwa ong leh wa ka yalang toh wow yaklam yei ku kiwa yoh ya u khñiang kjut ha kani ka jylla, kiwa mih na ki ar liang kitæ na ki BSF wa naka khawai bia ha Greenwood Resort kawa em ha Khanapara, Assam.
Da ong u leh wa ki paidbah embynta ki wow yada nei poor kani ka khlam hapoh ka jylla, neibhah wa nadooh wa sdang ka Lockdown, kiwa chong chnong da e ki yei kyrchaan ya ka sorkar iwa da pynman yaka jylla kawa ye wow yada nei poor u COVID-19 ha ka imlang sahlang.
Neiliang uwa e ktien ka Congress uwa man leh u MLA ka Mawsynram, u Himalaya Shangpliang da ong u wa ka Congress da e yumut ko wow pynsangeh chwa yei wan ki bru na baar jylla wow pyntikna ya kitu ki kari kiwa lai lyngba ka Meghalaya cha Assam næ Tripura wa ym toh wow sangeh ki hapoh Meghalaya, hawa ka sorkar da pyntip ko ha ka yalang wa da dep pynmih ya ka hukum wa ym chah ya ki dukan wow wai kiwa em ha ki sarok bah.
U Shangpliang da pyntip u leh wa neiliang ka liang pyrchah da kyntu ko yaka sorkar wow pyntip yei pyrtuid yong kitu ki bru kiwa em ya u khñiang COVID-19 cha kiwa synchaar chnong wei kamjooh wow pyntip ya i thaw sah khnang wa ki paidbah u ye ki wow kiar.
U Montri Rangbah, u Conrad K Sangma da ong u wa hanla ha kini ki kajiak sngi da ku kiwa yoh COVID-19 tangwa ka sorkar dang ye ko wow kdoh u khoom wei wow booddien yei poor cha kiwi won ki bynta ha ka imlang sahlang ha ka jylla, deiwa ong wa ka sorkar daw pyntikna wa waroh kiwa chong chnong u chong chngaaiñ ki yow lait na ka khlam.
Da ong u leh wa uni u COVID-19 ym pu wiar u kattæ wei ka sorkar leh ym ye ko wow khang bait yaka jylla, deiwa pynrap wa ki paidbah toh u sñiawthooh ki wa hap wow imlang wa u khñiang kjut ya katni deiwa man kiwa syndong bha. Wei ki bor pynlai chnong ye ki wow pynkrehkaam yaka Micro Lockdown næ ka Individual Lockdown namo i jar jiar i khang chnong ki booh kyndon kiwa man kam kiwi ki laad yada hi nei chah ktah ha ka khlam.
U Conrad da ong u wa ki paidbah ym toh wow yoobeiñ næ paitkhmat ya ki wakreh wa em hakhmat kiwa yong i chait i khiah, neibhah i yoobeiñ daw pyndooh mynsien ya ki wakreh ha ki bynta wow yada ya kiwa chong chnong. Da ong chooh chooh wa waroh kiwa MLA toh u chim ki ya i kitkhlieh neibynta wow pynsñiawthooh cha ki paidbah wa ym toh u yoobeiñ ya kiwon kiwon kiwa em hakhmat dooh wow yakhun yaka khlam.
