Shillong: I leh warom wa khaddooh ya i met wa sah yong u Hispreaching Son Shylla da pyndep noh ynne ka sngi ha yung sah yong uni u rangbah kawa em ha Lum Khyriem, wei hadien ini da rah wow tlep won ha u loom tlep-bru ka Balang Shillong ha Mawblei.
Ha kani ka sngi neiliang ka yung krehkaam yong ka Deputy Commissioner ka East Khasi Hills da e bor kyrpang ko wow pynemburom ya u Shylla uwa man uwi na ki bru saiñpyrthai wa paawkhmat ha ka jylla, wei da sakhi leh ya i tooid yong kiwa maya kiwa da lai wow sñiawlem ha kani ka sngi hachwa wow tlep noh ya i met.
Ha kani ka sngi da yoh ya i klam na ki seiñ wa ki kynhun waphær waphær, wa kynthup leh na ka Kur Shylla kawa ha Khasi Jaiñtia, ka Kur Syiemiong wei da emlang ha kani ka sngi wa u MLA ka South Shillong, u Sanbor Shullai wei kamjuh u MLA ka North Shillong uwa da e yei klam nalor ki MDC ka KHADC, wa kynthup ya u Chairman, u Pyniaid Sing Syiem wei neiliang ka Council da e yei klam da u Bindo M Lanong uwa man u MDC wa rap rim dooh wei uwa yachem bha wa u HS Shylla.
Kiwa klam da kynmoo tympang ki yaki kaam wa u HS Shylla da leh u wei ha i man rangbah yong oo ym jooh kynrandien wei klam u ya kiwa ym sñiaw yatoh u, wei da pynsñiaw ki leh wa i khlaad noh yong uni u rangbah daw man ko i dooh wa khroo yaka jaitbru Ynñiawtrep, neibhah wa man u uwi u rangbah uwa pynsawa bha ya i sur deiwa wanrah leh ya ki Bill waphær waphær wow yada ya ka jaitbru ha i por wa man kam u CEM ka KHADC.
I angnood yong u HS Shylla hadooh chwa wow khlaad noh, toh neibynya wow yada ya ka jaitbru wow pynmankaam ya ka Inner Line Permit, ka Khasi Hills Autonomous District (Khasi Social Custom of Lineage) (Second amendment) Bill, 2018, wa ka Khasi Hills Autonomous District (Khasi Social Custom Clan Administration) Bill, 2018.
Ya u HS Shylla da kha ha ka 7 tarik, u Duiatra (Jan), 1954 wei da khlaad noh u ha ka sngi Thohdieñ 7 tarik uni u bnai ha i rta wa 66 snem ha Super Care Hospital, Shillong hadien wa chitom u.
