Shillong: Ka yalang yong ka Meghalaya Pradesh Congress Committee (MPCC) kawa man ynne ka sngi da rai wow pynneh ya u Dr. Celestine Lyngdoh kam u President ka Party.
Katkam i pyntip u Working President uwa man leh u MP ka Shillong, u Vincent H Pala, da ong u wa ka Party ka skem wei tylli ko haka jylla, deiwa pynsñiaw leh wa i mih haki khubor wa em ki MLA kiwa kwah wow pynkylla ya uwa yahkhmat ha ka jylla man ko kawa bakla.
Da pyntip u leh wa hanla da em ki MLA kiwa da thoh cha ka All India Congress Committee wow dawa pynkylla ya u President, tangwa hadien i pynche wa u Dr. Lyngdoh em u hei eh ha ki kaam yung neidaw wa chitom ka bei u, kini ki MLA leh da pynsñiaw ki yei hun wow pynneh ya u President ka MPCC wa katni. Da pyntip u leh wa ka Party daw chim rai ko leh wow thung chooh chooh kiwa e ktien wow pynsñiaw cha ki paidbah yaki kaam ka Party.
Hawa kylli, u Pala da ong u wa hadooh kattæ, ka Party man ko kawa skem, deiwa ong leh wa i mih yong ki kattu katni ngut kiwa yahkhmat chwa ka Election 2018 toh neidaw wa ym ye chah de ki wow chong ha ka liang pyrchah neibhah wa kwah ki wow em bait ha i bor, wei i pynbaad wa ym hun ki ya u Dr. Mukul Sangma kam uwa yahkhmat toh du wow e daw.
U Pala da pyntip u leh wa ha kani ka yalang wa da chimbynta lang da u Luizinho Faleiro uwa man u Secretary ka AICC wa pait yaka jylla Meghalaya, da yatai bha leh hawa yatoh wow pynkhlan yaka Party hapoh ka jylla, kamjooh hajrong i tkoh ka sorkar Meghalaya Democratic Alliance wow yakhun yaka khlam COVID-19 haka jylla wei i pynkrehkaam yaki Scheme yong ka sorkar India.
Katkam wa pyntip u Pala, neiliang u Faleiro da e yumut leh kammon wow pynkhlan yaka Party nadooh ki Unit, ki Circle wa ha ka jylla waroh kawi.
Uwa yahkhmat ka Congress da ong u leh wa haka yalang da yatai sani bha neibynta wow sdang pynkhreh noh yaka Election 2023 khamtam ha kitu ki Constituency ki wym em de ki MLA naka Party, deiwa bichaar bniah bha leh ya kiwon kiwon ki kyrtong kiwa kwah wow yakhun yaka Election.
