U montri wa pait yaka chnat i chait i khiah yong ka jylla u AL Hek da kular u wow chimkhia u ya i angnood yong ka chnong Shangpung wow pynku kyrdan noh ya ka Shangpung PHC cha ka CHC kawa pura.
“Nga sñiawthooh O yei eh yong ki paidbah khamtam ha i liang wow yoh ya i sumaar wa biang wa paka ha ki thaaiñ ki yong ki, kamtæ kam u montri wa pait yaka chnat deilang wa i krehlang wa u Comingone Ymbon uwa man u MLA ka Raliang Constituency wei kamjooh u montri hapoh ka sorkar jylla u chimkhia i ya kani ka kaam wow pynku kyrdan noh ya kani ka PHC cha ka CHC,” da ong u AL Hek hawa klam cha kiwa thoh khubor ha i hiar lai pait u yaka PHC ha chnong Shangpung ynne ka sngi.
U Hek da ong u wa neiliang yong ka chnat i chait i khiah kattæ daw hap ko wow pynkhreh ya kiwa emkaam waroh nalor ki kot ki sla neibynta wow pynku noh cha ka CHC, wei hajrong ini, neiliang ka Engineering Wing yong ka chnat leh daw wan pait ki yeiwa emkaam.
“Neiliang yong nga wa u MLA ka thaaiñ u kreh chitom wow pynmankaam yei angnood yong ki paidbah wei da emkaam leh wow rap pynboon yaki wakreh kam ki Doctor, ki Nurse wa kiwi wei hawa yatoh wa ini daw chong ko haka chnat muna tyngka (Finance) wow leh ya iwa emkaam. Wei daw pha i leh cha u Montri Rangbah ka jylla yow pynsñiaw yei emkaam yong kani ka PHC,” da ong u Hek.
U Hek da pyntip u leh wa i kular yong oo da wan i hadien wa neiliang u Comingone Ymbon na i por cha i por da jooh wan u wow pynsñiaw wei kyrpaad hakhmat yong oo ya i emkaam wow pynku kyrdan noh ya kani ka PHC khamtam hawa da boon ki bru (Population) ha ka chnong wa ki chnong wa marjan wa yoh ya i chakri na ka PHC, kamtæ du ha ka kyrdan PHC da booh ko hei eh ya kani ka thaw wow e yaka sumaar wa biang wa paka.
Da pyntip u leh wa ka sorkar hapoh i yahkhmat u Montri Rangbah ini wadep da pynlait ko T. 75 klur kam ka laad wow pynkhlan ya i e sumaar ki PHC, CHC wa kiwi kiwi. Katwa yei pynku kyrdan yaka PHC cha ka CHC ym toh deiwa chna thymme wei deiwa pynmiat pynbiang ya kiwa emkaam yong ki thaw e sumaar khnang wow pynsuk yaki paaid chong chnong wow yoh ki yei sumaar wa paka yow lait nei lai thooh thaw sumaar cha kiwi ki thaw.