Shillong: Neidaw wa em wa yoh COVID-19 kamjooh leh wa em kiwa em hei maa wow yoh ya uni u khñiang ha ki yung (Building) wa em ha Jail Road wa ki thaw wa em ha Jhalupara wei yow ye u leh ya i Contact Tracing, Quarantine, Testing kamjooh wow khangkset ya kini ki thaw yow yada ya ki paidbah nei poor uni u khñiang, ka District Magistrate, East Khasi Hills District, da pynmih hukum ko haka 30th wa 31st August, 2020 yow pynbna ya i Matri Nawas Building wa em ha Jail Road, ki yung u Raj Jaiswal wa u Nabin Chettri ha Gopalji Compound ha Jhalupara wa ki yung u Vishnu Chettri wa u Dinesh Thapa ha Maya Compound ha Jhalupara yow man ki kam ki Containment Area yow khang yei psiah i mih khlem yoh bor cha kini ki thaw.
Kani ka hukum da khang ko ya kiwon kiwon wow psiah cha kini ki thaw kamjooh kiwa em hapoh kini ki thaw wow neh bait ki hapoh yung.
Da khang wow pynman ya kiwon kiwon ki yalang paidbah, u wai ya ki dukan, ki yung krehkaam sorkar kamjooh yong ki bru samen wa em ha kini ki thaw.
Ka hukum ym em khang ko ya ki wakreh ka chnat i chait i khiah, ki wakreh ka Shillong Municipal Board, ki laad pathai khubor, ki Petrol Pump wa kiwa li booh kum LPG.
Ya kiwa leh pyrchah daw pynchitom katkam ka aiñ Disaster Management Act, 2005 waka IPC.
Ha kawi tawon ka hukum, ka District Magistrate ka East Khasi Hills da pyndam ko yaka hukum pynman Containment Area ya i yung (Building) ka Adentis Lyngdoh, Lawsohtun Block IV (Main Road) Shillong, nadooh ka August 31, 2020.
Ya ini da leh hadien wa da pyndep yaka Contact Tracing wei da yoh leh yaka Test Result.
