U Meghalaya Assembly Speaker u Metbah Lyngdoh ynne ka sngi da pyntip u wa da booh thong wow pyndep u chna yaka yung Assembly Building wa thymme ha Mawdiangdiang ha u Kmaichonglad (Dec) 2021.
“Kwah i wow pynman yaka dorbar mang tyngka u 2022 haka yung dorbar chna aiñ wa thymme kawa man leh ka lyngkhooh dap 50 snem ka jylla. Wei ini chong ko lada lai bait katkam wa da thmu,” da ong u Metbah hadien wa lai pait u hadooh katwon lai i kreh chakhmat heiwa da emlang u Urban Affairs Minister u Hamletson Dohling, Chief Secretary, MS Rao, ki sahep sorkar wa kiwa mihkhmat neiliang kiwa chna ya ini i yung dorbar ha Mawdiangdiang ynne ka sngi.
Da ong u leh wa 50% i kreh toh iwa da pyndep deiwa pynrap wa ka sorkar jylla u pyntikna ko waka poisa u wan bait ko yow lait u thut i kreh.
I dor wa da booh wow pynlut yow chna toh T. 141 klur wei i dor ka Tender toh T. 127.76 klur.
“Da e T. 60 klur cha ka PWD (Building) yow pynkreh ya kani ka kaam,” da ong u Metbah.
Da pyntip u leh wa daw em ka rukom saam um wa kyrpang neibynta kani ka yung dorbar chna aiñ ka jylla.
Kam wow pynkynmoo wa ka High Powered Committee ha u Thohlakhmi (Feb) 2019 da e ko yei kreh cha ka Rajkiya Nirman Nigam Ltd. yow chna heidor wa T. 127 klur.
Hadien wa i yung dorbar warim da iñ i ha u 2001 hadooh katni ym pu em yoh ya ka yung dorbar wa pura hapoh ka jylla.
