Jowai: Hadien wa pynmih khubor haka 1 tarik uni u bnai da u Dapoi Pyrtuh uwa da kam wa da chem u lyngba ka RTI yei baamtooh hei pynkreh yaka Scheme chna paikhana ha chnong Sohmynting naka poisa wada pynlait ka chnat Public Health Engineering RWS Division, West Jaiñtia Hills, Jowai. Neiliang u waheh chnong ka Sohmynting u L. Pyrtuh ynne ka sngi da ong u wa ini i pynbaad man ko kawa khlem yurim, neibhah kiwon kiwon ki Scheme sorkar wa pynkreh hapoh chnong toh u pynkreh daka Committee wa emlang u Chairman, Secretary waki dkhot, ym toh iwa pynkreh da u/ka bru samen, katwa u Dapoi Pyrtuh da pynbaad u du ya u Chairman ka VWSC Sohmynting, kamtæ da kylli u waheh chnong cheiwon wiar u Secretary wa ki dkhot ka Committee, hei yong sakhiat ka VWSC toh ka Sub-Committee yong ka dorbar chnong Sohmynting, wei iwon iwon i kreh yong kani ka Committee haap ki hei pait i pynlai ka chnong. Wei ini waroh toh neidaw wa u Dapoi ha u snem 2019 da dooh u wow man waheh chnong ka Sohmynting neitæ i daw sdang u wow pynjæd pynpra yaka chnong.
“Nga kam u waheh chnong kwah O u pynche wa ha u snem 2015 hadien wa ka EC ka chnong da e bor ko yaka Village Water & Sanitation Committee, da pynkreh i ka ha man ki yung kiwa emkaam paikhana hapoh ka chnong wei hadien wa dadep kreh ya katai ka Scheme, ki dkhot yong ka Public Health Engineering RWS Division, West Jaiñtia Hills District da wan pait ki yei rukom kreh wei wym em mih ki dak kylli hajrong i rukom pynkreh yaka Scheme chna paikhana,” ong u L. Pyrtuh, waheh chnong ka Sohmynting.
Neitæ heipor wa u Dapoi Pyrtuh man waheh chnong u ha u snem 2016, kani ka Scheme da pyndep yei kreh, wei heini i por ym em u kylli u ya kani ka Scheme, wei da jia noh wa ha u snem 2019 da dooh u wow man waheh chnong, da sdang u wow thooh ki laad ki luti wow pynpra yaka chnong. Kamtæ da kylli wa na iyi i daw wa heipor wa man u kam u waheh chnong wym yarap wym sñiawlem u ya kiwa chong chnong katwa manda dooh u yei chaniah naki paidbah, sdang u pynthoh brai ya kiwa kitkaam chnong.
U waheh chnong u L. Pyrtuh da ong chooh chooh u wa i daw, i yurim wa u Dapoi Pyrtuh da pynbaad u ya ini i baamsap toh du wow pyndooh burom wei wow tympiah tympra donhi yei yatoh hapyrdi ki dkhot chnong. Hei sakhiat kam u waheh toh u thooh u ki laad ki luti u yarap pynyoh ki Scheme waphær waphær yow myntoi ki paidbah, katwa oo won da thooh daw u wow khynra yeiwa da dep.
“Nga kam u waheh chnong kwah O wow kyrpaad yaki para chnong wow yakrehlang chirup dei maya iwi ya iwi khnang wa ka chnong u ku ko chakhmat wei ka burom yong ka chnong leh ym wiar i,” pynkut u waheh chnong ka Sohmynting u L. Pyrtuh.
