Shillong: Uwa yahkhmat ka Congress ha ka jylla, uwa jooh man leh u montri warim ka sorkar warim, u Zenith M Sangma da pynbaad u wa ka sorkar ym em pynche ko yeiwa ong ka Congress hajrong i tkhoh krehkaam ka MeECL, neibhah da kylliang donhi ko ya u Chairman-cum-Managing Director (CMD) da u sahep uwa dang khynnah du wow da burom donhi, wei i thung da u sahep uwa dang khynnnah daw yoh ka sorkar wow leh katwa ngait.
Ini i pynbaad ka Congress wan i hadien wa da kylliang da u Arun Kumar Kembhavi (IAS) ha i thaw ka A Nikhla (MCS) kam u CMD wa thymme hadien wa mih i pynbaad na ka Congress wa i yakhih leh ki wakreh ka chnat ha ki bnai wa dadep.
Da ong wa i thung ya u CMD wa thymme toh wow da burom ka sorkar neibhah wa u CMD wa katni toh u sahep uwa dang khynnah uwa man Additional Secretary donhi.
U Zenith da ong u wa chwa wow chimkti kam u CMD ka MeECL emkaam ya u sahep wa da rap pnah wei ha ka kyrdan kam ki Additional Chief Secretary namo da u Chief Secretary kamwa da jooh leh, tangwa kamwa man katni ka sorkar da thung ko katwa ngait.
Da ong u wa ym em pyrchah samen u ya uwon uwon u sahep tangwa u CMD wa katni toh uwa dang khynnah uwa ksoh leh boon tylli ki kaam kiwa khia, kam u Director ha kawi ki chnat sorkar, da pait u leh ya ka Mining and Geology wa kamjooh leh kam u Commissioner of Taxes. Da pynrap u deiwa ong wa uni u sahep toh uwa da boonkaam chwa wei ymye u wow kreh kam u CMD neibhah wa da khia ware ki kaam u chawi.
Heiyatoh wa ka thaw pynmih bordiñ hapoh ka Umiam Hydro Power Project Stage III & IV, i duna ki kor iwa da wanrah ko yei doohnong wa hadooh palat T. 100 klur ha ka chi snem wei palat T. 10 klur chi bnai.
Da ong u leh wa hadien wa pynbaad ka Congress, ki kor ha ka Stage III leh da sdang chna biang ya ki khlem pynlut poisa, deiwa kylli leh wa neiyi i daw wa ka sorkar da suki ko waroh chi kattu khlem chna pynmiat wa da pynman ya ka jylla wow dooh ko da ki palat spah klur.