Shillong: Ka sorkar jylla lyngba ka chnat puræ puthi da klam che ko wa i wai ki skur nadooh ka 21 tarik uni u bnai toh du neibynta ki khynnah wa emkaam yarap na kiwa sikai khlem da pynbor, wei ym toh wow sdang noh ya i pynman Class kamwa jooh man neibhah ka Ministry of Home Affairs dang phah hi ko wow khang ya ki skur hadooh ka 30 tarik uni u bnai.
Hanla ka sorkar jylla da klam che ko wow bood ya iwa phah ka MHA deiwa e laad wow wai skur neibynta ki khynnah Class IX hadooh XII ya kiwa kwah yarap na kiwa sikai, tangwa ynne ka sngi da sakhi ya ka Gandhi Bunyadi Hindi High School kawa em ha Pynthorumkhrah wa pynman Class ko kamwa jooh man wei ki khynnah hap ki wow chong hapoh ki kamra deilang wa ki Uniform.
Neiliang u Montri Rangbah ka jylla, u Conrad K Sangma da ong u ynne ka sngi wa ye wow em i wai ki skur, tangwa ka sorkar da klam che biang ko wa i wai ki skur nadooh ynne ka sngi man bait ko du neibynta ki khynnah wa emkaam yarap na kiwa sikai, tangwa hadooh ynne ym pu chah wow pynman Class.
Hawa kylli, u Conrad da ong u wa ka sorkar daw thooh bniah wei paan pynche na kitu ki skur wa pynman Class.
Puræ leh: Nadooh ka 21 tarik u chah u wai ki skur tangwa ym toh yow pynman Class: Rymbui
