Neiliang ka NPP haka kyrwoh wa da phah da u Spokesperson ka Party u Phasmon Dkhar da ong wa ka sorkar MDA wa yahkhmat daka NPP Party hapoh u Conrad Sangma da thooh laad ko wa kammon u pynku wow wanrah ya i roi i paar ya ki thaaiñ palatsor ha waroh kawi ka jylla khnang wa ki paidbah, kiwa chong chnong u yoh ki wow rap yajan wa ki yung krehkaam ka sorkar wa ki khlieh District kamjooh yow pynsuk yaki paidbah ha waroh ki liang.
Heiyatoh wa i kyrriah yaka North Division ka PWD cha Shangpung, da ong wa i leh ya ini da ka sorkar ym toh deiwa khlem da lai thooh bniah khlem da sñiawthooh, neibhah i kyrriah man ko yow pynsuk ya ki paidbah ka thaaiñ wa ki ar tylli ki Constituency kitæ ka Raliang Constituency waka Mowkaiaw Constituency wei ym toh wa rah ya kani ka chnat sorkar cha kiwi ki District wei dang neh hi ko hapoh ka District.
Da ong wa ki sarok kiwa em wa pait hapoh ka North Division toh kiwa em hapoh 500 Km i jrong kiwa em leh ha ki ar tylli ki Constituency wei ym em u sarok yong ka Jowai Constituency wa em hapoh kani ka North Division wei hajrong kani ka yurim da kyrriah ya kani ka Division yei myntoi ki paidbah wei yow suk leh ki kaam ki jam wei daw wanrah ko leh yei myntoi ya ki paidbah ha kiwi ki liang yow yoh kreh ki.
Hawa e yei jubab yeiwa klam u Andrew Shullai, MDC ka Jowai Central, uwa da pyrchah dei wym em yurim uwa da ong leh wa hawa kyrriah ka sorkar toh u chna Division thymme, kamtæ da pynche wa ha ki Division ka PWD ha Jowai kitæ ka North, Central wa South Division, ha North da em ko kamwa 490 Km ki sarok, Central da em ko kamwa 309 Km, South em ko kamwa 310 Km iwa da poi waroh palat 1100 Km wei lada pait ya kiwi ki Division wa em hapoh ka jylla kam ka Nongstoin Division em ko kamwa 700 Km ki sarok, Shillong South Division kamwa 678 Km, Umsning Division kamwa 607 Km, NEC Khliehriat kamwa 675 Km, Tura Division kamwa 633 Km kamtæ kammon wow chna daka Division wa thymme heiwa lada yabhah yaki Division ha Jowai tang chi 250 Km chi Division leh ym yoh sarok.
Hajrong ka jooh ya yurim da kylli wa ileh wa ha u snem 2015 heipor wa kyrriah yaka NEC Division na Jowai cha Khliehriat ileh ym em pyrchah u ya ini deiwa dawa wow chna thymme yaka NEC Division lyngba u MLA yong oo ha kitu ki por, kamtæ i ong yong oo ym em yurim ko neibhah waroh ki sarok wa em haka North toh ki yong ki ar tylli ki Constituency.
Heiyatoh won wa u Wailadmiki Shylla uwa man leh u MLA ka Jowai Constituency, da pynche wa nyngkong pyrchah u ya i thmu wow kyrriah, tangwa hadien manda pait u yaka yurim wow kyrriah ya ka North Division da sñiaw u wa em yurim hi i thmu ka sorkar u kyrriah yaka wei na ini i daw ym em de pyrchah u ka, kamjooh leh wa lada kyrriah ki yaka North cha Shangpung, ka sorkar toh u booh ko da kawi ka chnat heithaw yong ka heiwa neiliang u Montri Rangbah wa u MLA ka Jowai da pynbna ki wow booh daka ka District Secretariat heithaw yong ka North Division kawa rap heh rap bha chooh chooh.
U Spokesperson da ong u leh wa da sdang u chna DPR yong kani ka District Secretariat wei ym man ko ka kaam wow sahteiñ kam ka Iawmusiang Market, ka saam um cha Jowai naka wah Umngot kiwa da sah da boon boon snem, wei kattæ kani ka sorkar da yaleh hi ko wow booddein ya kini ki kaam wa dang sahteiñ, chooh chooh heiwa u Montri Rangbah hapoh ka yung dorbar ka sorkar hakhmat ki MLA da klam che u yeini i thmu ka sorkar u chna District Secretariat ha Jowai wa Tura khnang wa ki paidbah u suk ki, wei da sdang ki u pyrkat kam kiyi de ki chnat wa toh u psiah ha kani ka District Secretariat wei ymtoh wa phon mit mit ki yaki paidbah wa chong chnong ka Jowai waka Tura.
Chooh chooh da ong wa u Montri Rangbah toh uwa maya yaka Ri-loom Jaiñtia wei kwah u wow wanrah ya ka roi ka paar ha waroh i liang yaka thaaiñ wei i em ka District Secretariat toh iwa bha boon chah bar yei em da kawi ka Division.
Heiyatoh won wa ki wakreh em hi ka laad wow pynbait deiwa ya kyrriah na kawi ka Division cha kawi ka Division iwa ye u leh kamtæ da kyrpaad yaki paidbah wow pdiang ki ya i thmu wa bha ka sorkar.
