U MDC ka 10 Mynsngat Khanduli Constituency, u Dawan Lyngdoh da khut u ya ki paidbah ka Ri-loom Jaiñtia kiwa im ha khappood wa ka jylla Assam wow yakhun chirup heiyatoh wa u pood u ang wa ka Assam neibhah ymtoh de u yang ya ka sorkar Meghalaya neibhah wa kat dang mih ki sngi u pood u ang ki chnong dang khian u katwa kamtæ dang joor i chah pyndik ki ha ki bor sorkar ka Assam.
Da ong u wa ka sorkar Assam ymjooh ap ko yeiyi yeiyi wei da leh embor ko katwa ngait deiwa kreh ya u sarok na Umpawiang cha Lakaroi, Lapangap deiwa ktah leh ya ki thaw ki bru samen wei hanla em i pyrchah, neiliang ka sorkar Assam ym mano ko yeitæ wei da sakhi leh yei chna sarok na Khanduli cha Mokoiram iwa da ktah ya ki dieñ ki siej na kpær yong ki bru.
Da ong u leh wa ym slem de ka Assam daw booh ko ya ka Battalion Camp ki pulit wa ki Forest Check Gate iwa daw ktah joor i ya ki paidbah ka Ri-loom Jaiñtia khamtam ka chnong Khanduli, Lapangap, Myni, Mokoiram, Artiang Sanphaw wa Saitsama kiwa da chah ktah neipor cheipor nei em ki thaw sah ki pulit ka Assam wa ki Forest Check Gate nadooh na sarokbah chadooh ki sarok khloo wei ya ka Forest Check Gate ha Myni, du chiteiñ kilometer da booh biang ya ka Camp ha Mokoiram wa ka Forest Check Gate wei neini du hapoh chi kilometer da booh biang ya ka Battalion Camp ha ka chnong Artiang Sanphaw wa ka Forest Check Gate ha ka chnong Lakaroi chwa wow psiah ha Lapangap wei ini i leh da booh ya ki bru ha i eh i khoo neidaw wa da kær talawiar soodong da ka Assam wei em ki hapoh u pood u ang ka JHADC wa Meghalaya.
Da ong u leh wa neiliang ka Meghalaya da em du kawi ka Battalion Camp ha Khanduli katwa ka Police Outpost wa ka Forest Check Gate won ha Saitsama heithaw wow em ki ha Khanduli.
I tlot ka Meghalaya da pynman i ya ki bru na Assam wow leh embor ya ki bru na ka jylla nadooh i lai i wan wa i khih i kreh wot hadooh i chah daiñ kuna hawa kit ki ya ki mar wa pynmih na ki kpær yong ki.
Iwa sñiawsih toh wa ka chnong Artiang Sanphaw toh kawa dang jied ya kiwa mihkhmat kam ki MLA 2018 & MDC 2019 tangwa katni da sah ki hei doom i langoh neidaw wa chah iehbeiñ ki ha ka sorkar Meghalya nadooh u khoo rachon, phniang charak wa ka Scheme 100 sngi.
Da ong u leh wa iwa pynsñiawsih chooh chooh ya oo toh i wym embynta ka Executive Committee ka JHADC Jowai hajrong u pood u ang wa i chem chitom ki paidbah ka District.
Hajrong ini, da kyntu u ya ki paidbah wow kreh chirup wow yakhun pyrchah katwa dang biang i por wei heipor wa chim ya ka rai yaklam toh u beh noh ya kini ki Battalion wa Check Gate kiwa em hapoh ka jylla.
