Ka 4-Mowkaiaw Block Congress Committee (BCC) kam chibynta i lai luti neibynta u pynkhreh yaka Election 2023, ynne ka sngi da pynskem ko ya kiwa ksohkaam thymme yong ka wei heijooh i por leh da pdiang burom ko ya kiwa wan psiah thymme cha kani ka Party haka yalang wada pynman ha Mowkaiaw Dorbar Hall.
Kiwa ksohkaam thymme ka Mowkaiaw Block Congress Committee, kynthup ko ya u President u Rikut N Parien, Vice President u Hamboidei Sumer, General Secretary u F. Suiam, Asst. Secretary u Ioanis Manner, Treasure u Brington Shylla wa u Social Media Coordinator u Cleverson Shadap.
Ki Delegate yong ka PCC kynthup ki ya u Overfive Biam, u Nidaemkam Lyngdoh, u Ever Sumer, u Rimiki Lathong waka Medalin Dhar najrong ki Executive member.
Kiwa ksohkaam ka Mahila Congress Committee kynthup ki yaka Rimanchwa Suchiang kam ka President, ka Hababiang Wann kam ka Secretary katwa ki Adviser kynthup ki ya u ECB Bamon wa u Nehemayah Tyngkan.
Ha kani ka sngi ka BCC da pdiang burom haroh ko cha ka Party ya u Fivestar Suiam deilang wa 10 ngut kiwi won.
Neiliang u Fivestar Suiam da pynsñiaw u yei daw wa psiah u cha ka Congress, deiwa ong wa ka toh kawa em yaka yurim wei kawa sñiawthooh leh yei eh i khoo ki paidbah.
U F. Dkhar, General Secretary yong ka Meghalaya Pradesh Youth Congress MPYC da kdaw u ya ki kattu katni i yaphær hapyrdi ka Congress wa ka BJP, deiwa pynbaad leh wa ka BJP toh kawa leh embor wei wym jooh em i pynsñiaw paidbah næ phyllu yumut ko chwa wow wanrah ya kawon kawon ka Bill. Da e nongmuna u wa nadooh wa pynkylla ko yaka poisa, wa wanrah ko yaka GST, ka CAA, ki aiñ ki warep, wei wot hapyrdi i pyrchah ki paidbah deiwa pynman yakhih leh wym em ap ko.
Heijooh i por da kdaw haroh u yaki kaam pynroi wada wanrah daka Congress neibynta i roi i paar u paidbah.
